ଖ୍ୟାତନାମା ନିର୍ଦ୍ଦେଶିକା କଳ୍ପନା ଲାଜମୀଙ୍କ ପରଲୋକ

ମୁମ୍ବାଇ: ବଲିଉଡର ଖ୍ୟାତନାମା ନିର୍ଦ୍ଦେଶିକା କଳ୍ପନା ଲାଜମୀ ଆଉ ନାହାନ୍ତି। ସେ ଆଜି ସକାଳେ ମୁମ୍ବାଇଠାରେ ପରଲୋକ ଗମନ କରିଛନ୍ତି। ମୃତ୍ୟୁବେଳକୁ ତାଙ୍କୁ ମାତ୍ର ୬୪ ବର୍ଷ ବୟସ ହୋଇଥିଲା। ସେ ଦୀର୍ଘ ଦିନଧରି କିଡନି କର୍କଟ ରୋଗରେ ପୀଡ଼ିତା ଥିଲେ। ଖ୍ୟାତନାମା ନିର୍ଦ୍ଦେଶିକା କଳ୍ପନା ଲାଜମୀ ବହୁ ଚର୍ଚ୍ଚିତ ରୁଦାଲୀ,ଦମନ୍‌,ଏକ୍‌ ପଲ୍‌ ଏବଂ ଚିଙ୍ଗାରି ଭଳି ସିନେମାର ନିର୍ଦ୍ଦେଶନା ଦେଇଥିଲେ। ସେ ଛୋଟ ବଜେଟର ସିନେମା ନିର୍ମାଣ କରିଥିଲେ। କିନ୍ତୁ ସେଥିରେ ଡିଂପଲ କାପାଡିଆ  ଏବଂ ମିଥୁନ୍‌ ଚକ୍ରବର୍ତ୍ତୀଙ୍କ ପରି ନାମୀ କଳାକାର ଅଭିନୟ କରିଥିଲେ।  ଖାଲି ସେତିକି ନୁହେଁ ତାଙ୍କର ଅଧିକାଂଶ ସିନେମା ଥିଲା ନାରୀ କୈନ୍ଦ୍ରିକ ।