ଭିଡିଓ ଭାଇରାଲ୍‌, ନର୍ସ ହଟହଟା

ଅନୁଗୋଳ : ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟର ଜେରିଆଟିକ ୱାର୍ଡରେ ଜରପଡ଼ାର ସୁକୁଟୁ ଦାସ ନାମକ ଜଣେ ବୃଦ୍ଧ ଭର୍ତ୍ତି ହୋଇଥିବାବେଳେ ଅବସ୍ଥା ଗୁରୁତର ହେବାରୁ ଡାକ୍ତର ଇସିଜି ସହ ଆନୁସଙ୍ଗିକ ପରୀକ୍ଷା ନିମନ୍ତେ ପରାମର୍ଶ ଦେଇଥିଲେ। ଜିଲ୍ଲା ମୁଖ୍ୟ ଚିକିତ୍ସାଳୟରେ ଏ ସବୁ ପରୀକ୍ଷା ମାଗଣାରେ ହେଉଥିଲେ ମଧ୍ୟ ହସ୍ପିଟାଲର ଜଣେ ନର୍ସ ସୁକୁଟୁଙ୍କ ପୁଅକୁ ଘରୋଇ ପାଥୋଲାଵକୁ ଯିବାକୁ କହିଥିବା ଅଭିଯୋଗ ହୋଇଛି। ଏକ ଭିଡିଓ ଭାଇରାଲ୍ ହେବା ପରେ ଏ କଥା ସାମ୍ନାକୁ ଆସିଛି। ଏ ନେଇ ଜଣାପଡ଼ିବା ପରେ ଅସନ୍ତୋଷ ପ୍ରକାଶ ପାଇଥିଲା। କିଛି ସାମାଜିକ କର୍ମୀ ଏ ନେଇ ନର୍ସଙ୍କ ସ୍ପଷ୍ଟୀକରଣ ମାଗୁଥିବା ଭିଡ଼ିଓରେ ସ୍ପଷ୍ଟ ଭାବେ ଜଣାପଡୁଥିବା ବେଳେ ହସ୍ପିଟାଲରେ ଇସିଜି ମାଗଣାରେ ହେଉଥିବା ସେ ଜାଣି ନଥିବା ସଫେଇ ଦେଉଛନ୍ତି। ତା’ ସହ ସେ କ୍ଷମା ପ୍ରାର୍ଥନା ମଧ୍ୟ କରୁଥିବା ଦେଖିବାକୁ ମିଳିଛି।