ଭୁବନେଶ୍ବର : ଗାନ୍ଧୀ କୌଣସି ରାଜନୈତିକ ବ୍ୟକ୍ତି ନ ଥିଲେ। ସେ ଜଣେ ସନ୍ଥ ଓ ସମାଜ ସୁଧାରକ ଥିଲେ। ତାଙ୍କର ବ୍ୟକ୍ତିତ୍ବ ସାରା ଭାରତକୁ ଏକତା ସୂତ୍ରରେ ବାନ୍ଧି ରଖିଥିଲା। ଜାତୀୟ ଏକତାର ସେ ବାର୍ତାବହ ଥିଲେ। ଗାନ୍ଧୀ ବିଚାରର ପ୍ରାସଙ୍ଗିକତା ଥିଲା, ଅଛି ଓ ରହିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
ରାଜ୍ୟ ସ୍ବାଧୀନତା ସଂଗ୍ରାମୀ ସମିତି ଓ ଗାନ୍ଧୀ ଶାନ୍ତି ପ୍ରତିଷ୍ଠାନର ମିଳିତ ଉଦ୍ୟମରେ ଆଜି ଇନଷ୍ଟିଚ୍ୟୁସନ୍ ଅଫ ଇଞ୍ଜିନିୟର୍ସ ପରିସରରେ ‘ଜାତୀୟ ସଂହତି ଦିବସ’ ଅନୁଷ୍ଠିତ ହୋଇଯାଇଛି। ସମିତିର ସଭାପତି ବିଶିଷ୍ଟ ସ୍ବାଧୀନତା ସଂଗ୍ରାମୀ ଭବାନୀ ଚରଣ ପଟ୍ଟନାୟକଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ମୁଖ୍ୟମନ୍ତ୍ରୀ କହିଲେ, କେବଳ ଭାରତର ସ୍ବାଧୀନତା ନୁହେଁ, ଏକ ସୁସ୍ଥ ସମାଜ ଓ ସଶକ୍ତ ଭାରତ ତାଙ୍କର ଲକ୍ଷ୍ୟ ଥିଲା। ଦାରିଦ୍ର୍ୟ, ହିଂସା, ଅନ୍ୟାୟ ଓ ଅସାମାନତାରୁ ଭାରତକୁ ମୁକ୍ତ କରିବା ତାଙ୍କର ଲକ୍ଷ୍ୟ ଥିଲା। ‘ଅହିଂସା’କୁ ଆମ ସମ୍ବିଧାନର ମୁଖବନ୍ଧରେ ସ୍ଥାନ ଦେବା ପାଇଁ ମୁଁ ଦାବି କରିଆସିଛି। ଏହି ଦାବିକୁ ସମର୍ଥନ ଜଣାଇ ଏକ ସଫଳ ଦସ୍ତଖତ ଅଭିଯାନ କରାଯାଇଛି। ଲୋକମାନେ ଏହାଦ୍ବାରା ସଚେତନ ହୋଇଛନ୍ତି ବୋଲି ମୁଖ୍ୟମନ୍ତ୍ରୀ କହିଥିଲେ।
Prasanta Patnaik