ସୁନ୍ଦରଗଡ଼: ପାରାଦୀପରୁ ହେମଗିର ଥାନାର ଡୁଡୁକା ମାତାରାଣୀ ଫିଲିଂ ଷ୍ଟେସନକୁ ଆସୁଥିବା ଡିଜେଲ ଟ୍ୟାଙ୍କରରୁ ଡିଜେଲ ଚୋରି। ଶହେ କି ୨ ଶହ ଲିଟର ନୁହେଁ, ପାଖାପାଖି ୨୦ ହଜାର ଲିଟର। ୬ ମାସ ହେଲା ଯୋଜନାବଦ୍ଧ ଭାବେ ହେଉଥିଲା ଚୋରି। ଯାହାର ଆନୁମାନିକ ମୂଲ୍ୟ ୨୫ ଲକ୍ଷରୁ ଅଧିକ। ଖୋଦ୍ ଟ୍ୟାଙ୍କରର ଡ୍ରାଇଭରମାନେ କରୁଥିଲେ ଚୋରି। ଏଥିରେ ଏକ ବଡ଼ ଧରଣର ରାକେଟ୍ କାମ କରୁଥିବା ବେଳେ ସମ୍ବଲପୁର ଜିଲ୍ଲା ଚାରମାଳର ଏକ ଢାବା ମାଲିକ ମୁଖ୍ୟ କାର୍ପଟଦାର ବୋଲି ଅଭିଯୋଗ ହୋଇଛି। ଡ୍ରାଇଭରମାନେ ନକଲି ଚାବିରେ ଟ୍ୟାଙ୍କର ଖୋଲି ପ୍ରତି ଟ୍ୟାଙ୍କରରୁ ଶହେ ଲିଟର ତେଲ କାଢ଼ି ଢାବା ମାଲିକଙ୍କ ଠାରେ ବିକ୍ରି କରୁଥିଲେ। ପୁଲିସ ମାତାରାଣୀ ଫିଲିଂ ଷ୍ଟେସନର ୩ ଟ୍ୟାଙ୍କର ଡ୍ରାଇଭରଙ୍କୁ ଗିରଫ କରିଛି। ସେମାନେ ହେଲେ ସଦ୍ଦାମ ହୁସେନ, ମହମ୍ମଦ ମୋଇନ ଆଲମ, ମହମ୍ମଦ ରିଆଜୁଲ। ଘଟଣାଟି ସୁନ୍ଦରଗଡ଼ରେ ଚାଞ୍ଚଲ୍ୟ ଖେଳାଇ ଦେଇଛି। ମାତାରାଣୀ ଫିଲିଂ ଷ୍ଟେସନର ମାଲିକ ସଞ୍ଜୟ କୁମାର ନନ୍ଦ ହେମଗିର ଥାନାରେ ଦେଇଥିବା ଏତଲା ଅନୁସାରେ, ତାଙ୍କର ଡୁଡୁକାରେ ମାତାରାଣୀ ନାମରେ ଏକ ଫିଲିଙ୍ଗ୍ ଷ୍ଟେସନ ରହିଛି। ପାରାଦୀପରୁ ପ୍ରତି ମାସରେ ୧୨ ଥର ଡିଜେଲ ଆସେ। ଏଥିରେ ତାଙ୍କର ନିଜସ୍ବ ୩ଟି ଟ୍ୟାଙ୍କର ( ଓଡି-୧୬ ୬୬୧୬, ଓଡି-୧୬ ୬୭୧୬ ଓ ଓଡି-୦୨ ଏବି ୨୨୧୬ରେ ନିୟୋଜିତ ରହିଛି। ଥରକେ ପ୍ରତି ଟ୍ୟାଙ୍କରରେ ୨୦ ହଜାର ଲିଟର ଆସୁଥିବା ବେଳେ ଗତ ୬ ମାସ ହେଲା ଫିଲିଂ ଷ୍ଟେସନକୁ ପହଞ୍ଚିଲା ବେଳକୁ ଶହେ ଲିଟର କମ୍ ରହିଥିବା ଶ୍ରୀ ନନ୍ଦଙ୍କ ନଜରକୁ ଆସିଥିଲା। ସେ ଏ ସମ୍ପର୍କରେ ଡ୍ରାଇଭରମାନଙ୍କୁ ପଚାରିଥିଲେ। କିନ୍ତୁ ସେମାନେ କିଛି ଜାଣି ନଥିବା କହିବା ପରେ ପାରାଦୀପ ଏଚ୍ପିସିଏଲ୍ର ଗୋଦାମ ପରିଚାଳକଙ୍କ ଦୃଷ୍ଟି ଆକର୍ଷଣ କରିଥିଲେ। କିନ୍ତୁ ଏଚ୍ପିସିଏଲ୍ ଗୋଦାମ ପରିଚାଳକ ଠିକ୍ ପରିମାଣରେ ଡିଜେଲ ଦେଉଥିବା ପ୍ରକାଶ କରିଥିଲେ। ଏହା ପରେ ଶ୍ରୀ ନନ୍ଦ ନିଜେ ଅନୁସନ୍ଧାନ ଆରମ୍ଭ କରିଥିଲେ। ଠିକ୍ ଏହି ସମୟରେ ଏକ ଟ୍ୟାଙ୍କରର ହେଲ୍ପର ଚୋରି ସମ୍ପର୍କରେ ସୂଚନା ଦେଇଥିଲା। ଡ୍ରାଇଭରମାନେ ୩ଟି ଯାକ ଟ୍ୟାଙ୍କରର ନକଲି ଚାବି ତିଆରି କରି ଗତ ୬ ମାସ ହେଲା ତେଲ ଚୋରି କରି ଚାରମାଳର ଏକ ଢାବାରେ ବିକ୍ରି କରି ଆସୁଥିବା ପ୍ରକାଶ କରିଥିଲା। ଥରକେ ୩ଟି ଟ୍ୟାଙ୍କରରୁ ୩ ଶହ ଲିଟର ଚୋରି କରୁଥିବା ସୂଚନା ମିଳିବା ପରେ ଶ୍ରୀ ନନ୍ଦ ୨୧ ତାରିଖରେ ହେମଗିର ଥାନାରେ ୩ ଡ୍ରାଇଭର ଓ ଢାବା ମାଲିକଙ୍କ ନାମରେ ଏତଲା ଦେଇଥିଲେ। ପୁଲିସର ତଦନ୍ତ ବେଳେ ଡ୍ରାଇଭରମାନେ କୁଆଡ଼େ ଡିଜେଲ ଚୋରିକୁ ସ୍ବୀକାର କରିଥିଲେ। ପ୍ରତି ମାସରେ ୩୬ ଶହ ଲିଟର ୬ ମାସରେ ୨୧ ହଜାର ଲିଟର ଚୋରି ହୋଇଥିବା ଶ୍ରୀ ନନ୍ଦ ଅଭିଯୋଗ କରିଛନ୍ତି। ପୁଲିସ ମାମଲା ରୁଜୁ କରି ୩ ଡ୍ରାଇଭରଙ୍କୁ ଗିରଫ କରି ତଦନ୍ତ ଚଲାଇଛି। ତେବେ ଢାବା ମାଲିକକୁ ତୁରନ୍ତ ଗିରଫ କରିବା ଶ୍ରୀ ନନ୍ଦ ଦାବି କରିଛନ୍ତି। ସୂଚନାଯୋଗ୍ୟ, କେବଳ ମାତାରାଣୀ ଫିଲିଙ୍ଗ ଷ୍ଟେସନ ନୁହେଁ, ସୁନ୍ଦରଗଡ଼ ଜିଲ୍ଲାର ଅନେକ ଫିଲିଙ୍ଗ୍ ଷ୍ଟେସନକୁ ଆସୁଥିବା ଡିଜେଲ ଏମିତ ବାଟରେ ଚୋରି ହୋଇଯାଇଥିବା ଅଭିଯୋଗ ହୋଇଛି। ଜିଲ୍ଲା ପୁଲିସ ଏଥିରେ ସମ୍ପୃକ୍ତ ରାକେଟ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି।
amfnews 445 Viewsକରଞ୍ଜିଆ: ରାତି ପାହିଲେ ୨୦୧୯ ସାଧାରଣ ନିର୍ବାଚନ ପାଇଁ ମତଦାନ। ସବୁଆଡ଼େ ସଜବାଜ; ପ୍ରଶାସନଠୁ ନେଇ ନେତା ଓ କର୍ମୀ ସବୁ ତତ୍ପର…