ମହାରାଷ୍ଟ୍ର: ରାସାୟନିକ କାରଖାନାରେ ବିସ୍ଫୋରଣ ଯୋଗୁଁ ୨୦ ମୃତ, ୨୨ ଆହତ

ନୂଆଦିଲ୍ଲୀ  :   ମହାରାଷ୍ଟ୍ରର ଧୁଲେ ଜିଲ୍ଲାରେ ଥିବା ଗୋଟାଏ ରାସାୟନିକ କାରଖାନାରେ ଭୟାବହ ବିସ୍ଫୋରଣ ଯୋଗୁଁ ଅଗ୍ନିକାଣ୍ଡ ଘଟି ଅନ୍ୟୂନ ୨୦ ଜଣ ଲୋକ ମରିଥିବା ବେଳେ ଅନ୍ୟ ୨୨ ଜଣ ଆହତ ହୋଇଛନ୍ତି ଏବଂ ଆହୁରି ୭୦ ଜଣ କାରଖାନା ମଧ୍ୟରେ ଅଟକି ରହିଥିବା କଥା ପୁଲିସ କହିଛି।

ଶୀରପୁର ତାଲୁକରେ ଥିବା ଓ୍ଵାଘାଡ଼ି ଗାଁରେ ଥିବା ଏହି ରାସାୟନିକ କାରଖାନାରେ ଏକାଧିକ ସିଲିଣ୍ଡର୍‌ ବିସ୍ଫୋରଣ ଯୋଗୁଁ ଅଗ୍ନିକାଣ୍ଡ ଘଟିଛି। ଶନିବାର ସକାଳ ପ୍ରାୟ ୯: ୪୫ ମିନିଟ୍‌ରେ ଏହି ଦୁର୍ଘଟଣା ଘଟିଲା ବେଳେ ଅନ୍ୟୂନ ୧୦୦ ଜଣ ଶ୍ରମିକ କାରଖାନା ଭିତରେ ଉପସ୍ଥିତ ଥିଲେ।

ଶୀରପୁର ଥାନା ଅଧିକାରୀ କହିଛନ୍ତି: ପ୍ରାଥମିକ ତଦନ୍ତରୁ ଜଣାପଡୁଛି କାରଖାନାରେ ଏକାଧିକ ସିଲିଣ୍ଡର୍‌ ବିସ୍ଫୋରଣ ଘଟିଛି। ଏ ପର୍ଯ୍ୟନ୍ତ ପୁଲିସ ଓ ଉଦ୍ଧାରକାର ଦଳ ଆଠଟି ଶବ ଉଦ୍ଧାର କରିଛନ୍ତି। ଉଦ୍ଧାର କାର୍ଯ୍ୟ ଚାଲୁ ରହିଛି।