ଦେଶ ରକ୍ଷା ପାଇବା ଯାଏଁ ସତ୍ୟାଗ୍ରହ ଚାଲୁ ରଖିବି: ଧାରଣାର ଦ୍ୱିତୀୟ ଦିନ କହିଲେ ମମତା ବାନାର୍ଜୀ

କୋଲ୍‌କାତା: ଚିଟ୍‌ଫଣ୍ଡ୍‌ ଦୁର୍ନୀତି ସଂକ୍ରାନ୍ତରେ କୋଲ୍‌କାତା ପୁଲିସ ମୁଖ୍ୟଙ୍କୁ ସିବିଆଇ ପଚରାଉଚୁରା ନିମନ୍ତେ କରିଥିବା ଉଦ୍ୟମ ବିରୋଧରେ ପ୍ରତିବାଦପୂର୍ବକ ଧାରଣା ଦେଇଥିବା ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର ଦିନ କହିଛନ୍ତି ଯେ ଦେଶ ଓ ତାହାର ସମ୍ବିଧାନ ରକ୍ଷା ପାଇବା ଯାଏଁ ସେ ତାଙ୍କର ‘ସତ୍ୟାଗ୍ରହ’ ଚାଲୁ ରଖିବେ।

ନ ଖାଇ ନ ପିଇ ମୁଖ୍ୟମନ୍ତ୍ରୀ ଏକ ଅସ୍ଥାୟୀ ମଞ୍ଚରେ କେତେକ ବରିଷ୍ଠ ମନ୍ତ୍ରୀ ଏବଂ ଦଳୀୟ ସଦସ୍ୟଙ୍କ ସହ ରାତି ସାରା ଉଜାଗର ରହିଥିଲେ।
ଧାରଣାସ୍ଥଳରେ ତାଙ୍କ ସହ ଥିବା ସାମ୍ବାଦିକମାନଙ୍କୁ ବାନାର୍ଜୀ କହିଛନ୍ତି: ଦେଶ ରକ୍ଷା ପାଇବା ଯାଏଁ ଏ ସତ୍ୟାଗ୍ରହ ଚାଲୁ ରଖିବି।

କୌଣସି ନେତା ତାଙ୍କୁ ଭେଟିବାକୁ ସହରକୁ ଆସିବେ କି ବୋଲି ପଚରା ଯିବାରୁ ସେ କହିଲେ, ମୁଁ ଜାଣେନି। ଯଦି କେହି ଆସିବାକୁ ଚାହାଁନ୍ତି ମୁଁ ତାଙ୍କୁ ସାଦରେ ଡାକିବି। ଏ ସଂଗ୍ରାମ ମୋ ଦଳର ନୁହେଁ। ମୋର ସରକାର ନିମନ୍ତେ।