ଶ୍ୱଶୁର ଘର ଲୋକେ ଜ୍ୱାଇଁଙ୍କୁ ମାରିଦେଲେ

ଯାଜପୁର  :  ପତ୍ନୀଙ୍କୁ ଆଣିବା ପାଇଁ ଯାଇଥିବା ବେଳେ ଜଣେ ବ୍ୟକ୍ତିଙ୍କୁ ତାଙ୍କ ଶ୍ୱଶୁର ଘର ଲୋକେ ମାରି ଦେଇଥିବା ଅଭିଯୋଗ ହୋଇଛି। ଏ ଘଟଣା ଘଟିଛି ଯାଜପୁର ଜିଲ୍ଲା ବରୀ ଥାନା ଅନ୍ୟାସପୁର ଗାଁରେ। ମୃତକଙ୍କ ନାଁ ସନ୍ଥ ସେଠୀ। ତାଙ୍କ ଘର କେନ୍ଦ୍ରାପଡ଼ା ଜିଲ୍ଲା ଇନ୍ଦୁପୁର ଗାଁରେ।

ସୂଚନା ଅନୁଯାୟୀ, ବର୍ଷେ ତଳେ ସେ ଅନ୍ୟାସପୁର ଗାଁର ଜଣେ ଯୁବତୀଙ୍କୁ ଭଲ ପାଇ ସାଙ୍ଗରେ ଧରି ଫେରାର ହୋଇଯାଇଥିଲା । ତେବେ ତା’ର ଚାରି ମାସ ପରେ ସେ ତାଙ୍କୁ ଆଣି ତାଙ୍କ ବାପ ଘରେ ଛାଡ଼ି ଦେଇଥିଲେ। ଗତକାଲି ରାତିରେ ସେ ତାଙ୍କ ପତ୍ନୀଙ୍କୁ ନେବାକୁ ଶ୍ୱଶୁର ଘରକୁ ଆସିଥିଲେ। ତେବେ ଝିଅକୁ ଛାଡ଼ିବେ ନାହିଁ ବୋଲି ତାଙ୍କ ଶ୍ୱଶୁର ଘର ଲୋକେ କହିଥିଲେ। ଏହା ପରେ ସେମାନଙ୍କ ମଧ୍ୟରେ ବଚସା ହୋଇଥିଲା।

ଅଭିଯୋଗ ପାଇ ପୁଲିସ୍ ଘଟଣାସ୍ଥଳରେ ପହଞ୍ଚିଥିଲା ଓ ମୃତଦେହକୁ ଜବତ କରିବା ସହିତ ସନ୍ଥଙ୍କ ଶାଶୂ, ଶ୍ୱଶୁର, ଶଳା ଓ ଗାଁର ଅନ୍ୟ ଜଣେ ଯୁବକଙ୍କୁ ଥାନାକୁ ନେଇ ପଚରାଉଚରା କରୁଛନ୍ତି।