ପୁରୀ : ବିହାରୀ ନେତାଙ୍କ ଷ୍ଟାଇଲ୍ରେ ମଞ୍ଚ ଉପରେ ନୃତ୍ୟର ତାଳେ ତାଳେ ଗୁଳିଚାଳନା କରିବା ନାରୁଆ ଓରଫ ନାରାୟଣ ସାହୁଙ୍କ ପାଇଁ ମହଙ୍ଗା ପଡ଼ିଛି। ଏହି ଘଟଣାକୁ ଗୁରୁତ୍ବର ସହ ନେଇଛି ପୁରୀ ପୁଲିସ। ଗତକାଲି ନାରୁଆଙ୍କୁ ଘନ ଘନ ଜେରା କରିବା ସହ ତାଙ୍କର ତିନି ସୁରକ୍ଷାକର୍ମୀଙ୍କୁ ଅଟକ ରଖି ପଚରାଉଚରା କରୁଥିବା ପୁଲିସ ଆଜି ଏହି ଘଟଣାରେ ନାରୁଆଙ୍କ ନାଁରେ ଟାଉନ ଥାନାରେ ଏକ ମାମଲା ରୁଜୁ କରିଛି। ଏହାଛଡ଼ା ଚନ୍ଦନପୁର ଥାନା ପୁଲିସ ନାରୁଆଙ୍କ ତିନି ସୁରକ୍ଷାକର୍ମୀଙ୍କ କାର୍ ଓ ବାଇକ୍ ଆଦିକୁ ଜବତ କରିଛି।
ଅନ୍ୟପଟେ ଗତକାଲିଠାରୁ ଜେରା ଚାଲିଥିବା ତିନି ସୁରକ୍ଷାକର୍ମୀଙ୍କ ନାଁରେ ପୂର୍ବରୁ ଏକାଧିକ ସଂଗିନ ମାମଲା ବିଭିନ୍ନ ଥାନାରେ ରହିଥିବା ଜଣାପଡ଼ିଛି। ଗତକାଲି ଏହି ତିନି ସୁରକ୍ଷାକର୍ମୀଙ୍କୁ ପୁଲିସ ଭିନ୍ନ ଭିନ୍ନ ସ୍ଥାନରୁ ଧରି ଥାନାରେ ଜେରା କରିଥିଲା। ଦୁଇ ସୁରକ୍ଷାକର୍ମୀଙ୍କୁ ଭାଇଲିପୁର ଛକରୁ ଓ ଅନ୍ୟ ଜଣକୁ ମାଳତୀପାଟପୁର ଛକରୁ ଧରି ପୁଲିସ ଥାନାକୁ ଆଣିଥିଲା। ଏଥିପାଇଁ ପୁଲିସର ଏକାଧିକ ଟିମ୍ ବିଭିନ୍ନ ସ୍ଥାନରେ ଚଢ଼ଉ କରିଥିଲେ। ତିନି ସୁରକ୍ଷାକର୍ମୀଙ୍କଠାରୁ ଦୁଇ ପିସ୍ତଲ ବି ଜବତ କରାଯାଇଥିଲା। ସେମାନଙ୍କ ଭିତରୁ ଜଣେ ଖଣ୍ଡିଘରର ପପୁ ବୋଲି ଜଣାପଡ଼ିଥିବା ବେଳେ ଅନ୍ୟ ଦୁଇଜଣ ଉତ୍ତର ପ୍ରଦେଶର ବକୁର କୁମାର ଓ ଦେବେନ୍ଦ୍ର କୁମାର ବୋଲି ଜଣାପଡ଼ିଛି।
Prasanta Patnaik