କୋଚି : ଜାନୁଆରି ୨୬ ତାରିଖରେ ଆୟୋଜନ ହେଉଥିବା ସାଧାରଣତନ୍ତ୍ର ଦିବସ ପରେଡ୍ରେ ପ୍ରଦର୍ଶନ ନିମନ୍ତେ ପଶ୍ଚିମବଙ୍ଗ ଏବଂ ମହାରାଷ୍ଟ୍ରର ପ୍ରଜ୍ଞାପନ ମେଢ଼ ନାକଚ ହେବା ପରେ କେରଳର ପ୍ରଜ୍ଞାପନ ମେଢ଼କୁ ମଧ୍ୟ ନାକଚ କରାଯାଇଛି।
ରାଜ୍ୟର କଳା ଓ ସ୍ଥାପତ୍ୟର ବର୍ଣ୍ଣନା କରୁଥିବା ପାରମ୍ପରିକ ଚିତ୍ରକଳା ତେୟାମ୍ ଏବଂ କଳାମଣ୍ଡଳମ୍ ଶୈଳୀରେ କେରଳର ପ୍ରସ୍ତାବିତ ପ୍ରଜ୍ଞାପନ ମେଢ଼ଟିକୁ ପର୍ଯ୍ୟବେଶଣ କରାଯାଇଥିଲା।
ଉଲ୍ଲେଖଯୋଗ୍ୟ ଯେ ଆସନ୍ତା ସାଧାରଣତନ୍ତ୍ର ଦିବସ ପରେଡ୍ ପାଇଁ ପ୍ରସ୍ତାବିତ ପ୍ରଜ୍ଞାପନ ମେଢ଼ ବାତିଲ କରାଯିବାରେ କେରଳ ହେଉଛି ଚତୁର୍ଥ ରାଜ୍ୟ। ପୂର୍ବରୁ ପ୍ରତିରକ୍ଷା ମନ୍ତ୍ରାଳୟ ମହାରାଷ୍ଟ୍ର, ପଶ୍ଚିମବଙ୍ଗ ଏବଂ ବିହାରର ପ୍ରସ୍ତାବିତ ପ୍ରଜ୍ଞାପନ ମେଢ଼ଗୁଡ଼ିକୁ ନାକଚ କରିଥିଲା।
ଏନ୍ସିପି ନେତା ସୁପ୍ରିୟା ସୁଲେ, ନବାବ ମଲିକ, ଶିବସେନାର ସଞ୍ଜୟ ରାଉତ, କଂଗ୍ରେସ ନେତା ଅଭିଷେକ ମନୁ ସିଙ୍ଘ୍ଓ୍ଵି ଆଦି ଅନେକ ବିରୋଧୀଦଳୀୟ ନେତା ସରକାରଙ୍କର ଏଭଳି ପଦକ୍ଷେପକୁ ସମାଲୋଚନା କରିଛନ୍ତି।
ସରକାରଙ୍କୁ ସମାଲୋଚନା କରି ଅଭିଷେକ ମନୁ ସିଙ୍ଘ୍ଓ୍ଵି କହିଛନ୍ତି: ମହାରାଷ୍ଟ୍ର, ବଙ୍ଗ, କେରଳ, ଦିଲ୍ଲୀ, ବିହାର ଓ ହରିୟାଣା ଭଳି ବିଶାଳ ରାଜ୍ୟଗୁଡ଼ିକୁ ବାଦ ଦେଇ ଭାରତର ବିବିଧତା, ଐତିହ୍ୟ, ସାଂସ୍କୃତିକ କ୍ଷମତା ଏବଂ ନିର୍ଯ୍ୟାସକୁ ନ୍ୟାୟ ଦେଇ ହେବନାହିଁ।
Prasanta Patnaik