ଜମ୍ମୁ-କାଶ୍ମୀର: ୧୪ଟି ଗ୍ରାମରେ ସେନା ପକ୍ଷରୁ ବଡ ଧରଣର ଅପରେସନ୍

ଜମ୍ମୁ-କାଶ୍ମୀରରେ ପୁଣିଥରେ ଏକ ବଡ ଧରଣର ସର୍ଚ୍ଚ ଅପରେସନ୍ ଆରମ୍ଭ କରାଯାଇଛି । ସେନା ପକ୍ଷରୁ ୧୪ଟି ଗ୍ରାମରେ ଏହି ଅପରେସନ ଚାଲିଛି । ଆତଙ୍କବାଦୀ ଲୁଚିଥିବା ଖବର ମିଳିବା ପରେ ସେନା ପକ୍ଷରୁ ଏହି ପଦକ୍ଷେପ ନିଆଯାଇଛି । ରାଜ୍ୟର ପୁଲବାମା ଜିଲ୍ଲାର ୧୪ଟି ଗ୍ରାମରେ ଏହି ଅପରେସନ ଜୋରଦାର କରାଯାଇଛି । ସିଆରପିଏଫ, ସେନା ମିଳିତ ଭାବେ କମ୍ବିଂରେ ସାମିଲ ହୋଇଛନ୍ତି ।

ହଜିବୁଲ କମାଣ୍ଡର ଜହୁର ଠୋକରର ପୈତୃକ ଗ୍ରାମରେ କିଛି ଆତଙ୍କବାଦୀ ଲୁଚିଥିବା ନେଇ ସେନା ଖବର ପାଇଥିଲା । ଶନିବାର ଦିନ ସେ ଲୁଚିଥିବା ଗ୍ରାମରେ ସେନା କମ୍ବିଂ କରିବା ସମୟରେ କିଛି ସ୍ଥାନୀୟ ବ୍ୟକ୍ତି ଯବାନଙ୍କ ଉପରେ ପଥରମାଡ କରିଥିଲେ । ପରେ ସେନା ପକ୍ଷରୁ ଏହାର ପାଲଟା ଜବାବ ଦିଆଯାଇଥିଲା । ଏହା ପରେ ଗତକାଲି ସୋପିଆନରେ ସେନା ଏବଂ ଆତଙ୍କବାଦୀ ମୁହାଁମୁହିଁ ହୋଇଥିଲେ । କିନ୍ତୁ ଆତଙ୍କୀ କମାଣ୍ଡର ଜୀନତ ଉଲ ଇସ୍ଲାମ ସମେତ ତିନି ସଦସ୍ୟ ଖସି ପଳାଇଥିଲେ ।

ଏହି ତଲାସୀ ଅଭିଯାନ ଚାଲିଥିବା ସମୟରେ କିଛି ବ୍ୟକ୍ତି ନିଜ ମୁହଁ ଲୁଚାଇ ସେନାର ଯବାନଙ୍କୁ ବିରୋଧ କରିବା ସହ ପଥର ମାଡ କରିଥିଲେ । ପରେ ସେନା ବାଧ୍ୟ ହୋଇ ଛଦ୍ମବେଶୀ ଆତଙ୍କୀଙ୍କ ଉପରେ ଲୁହ ବୁହା ଗ୍ୟାସ୍ ପ୍ରୟୋଗ କରିଥିଲା । ଏହା ପରେ ମଧ୍ୟ ପଥର ଫିଙ୍ଗାଳୀ ଚୁପ ହୋଇ ନଥିଲେ । ତେଣୁ ସେନା ପେଲେଟ୍ ଗନ୍ ଚଳାଇ ଏହି ପଥରମାଡକୁ କିଛି ସମୟ ପାଇଁ ରୋକ୍ ଲଗାଇଥିଲା ।