ମାଟ୍ରିକ୍‌ ପରୀକ୍ଷାରେ ସଂସ୍କାର : ନୂଆ ଶିକ୍ଷାବର୍ଷରୁ ନୂଆ ଢାଞ୍ଚା

ଭୁବନେଶ୍ବର : ୨୦୨୦ରେ ନୂଆ ଢାଞ୍ଚାରେ ହେବ ମାଟ୍ରିକ୍‌ ପରୀକ୍ଷା। ଓଏମ୍‌ଆର୍‌ ସିଟ୍‌ ତଥା ମଲ୍ଟିପୁଲ ଚଏସ୍‌ର ପ୍ରଶ୍ନୋତ୍ତର ବ୍ୟବସ୍ଥା ଉଠିଯିବ। ଏହା ବଦଳରେ ପ୍ରଶ୍ନପତ୍ରରେ ୫୦ ମାର୍କର ଅବ୍‌ଜେକ୍‌ଟିଭ୍‌ ଓ ୫୦ ମାର୍କ ସବ୍‌ଜେକ୍‌ଟିଭ୍‌ ପ୍ରଶ୍ନ ଆସିବ। ଗତ ମାଟ୍ରିକ୍‌ ପରୀକ୍ଷାରେ କେତେକ ସଂସ୍କାର କରାଯାଇଛି। ୪ ସେଟ୍‌ ପ୍ରଶ୍ନପତ୍ର ସହ ପା‌ସ୍‌ କରିବା ପାଇଁ ଥିବା ମାର୍କ ବ୍ୟବସ୍ଥାରେ ସଂସ୍କାର ଅଣାଯାଇଛି। ୨୦୧୯-୨୦ ଶିକ୍ଷାବର୍ଷରେ ଆଉ କିଛି ସଂସ୍କାର ଆଣିବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତି ହୋଇଛି।

ଏପ୍ରିଲରୁ ନୂତନ ଶିକ୍ଷାବର୍ଷ ଆରମ୍ଭ ହେବାକୁ ଥିବାରୁ ଦଶମ ଶ୍ରେଣୀ ପାଠ୍ୟପୁସ୍ତକରେ ସାମାନ୍ୟ ପରିବର୍ତନ ଆଣିବାକୁ ନିଷ୍ପତ୍ତି ହୋଇଛି। ବିଜ୍ଞାନ, ଇଂରାଜୀ, ଓଡ଼ିଆ ପରି ବିଷୟରେ ଗୋଟିଏ ଦୁଇଟି ଚାପ୍ଟର ଏପାଖ ସେପାଖ କରାଯାଇପାରେ। କେତେକ ଚାପ୍ଟରକୁ ପାଠ୍ୟକ୍ରମରୁ ବାହାର କରାଯିବାକୁ ଥିବା ବେଳେ କିଛି ନୂଆ ଚାପ୍ଟରକୁ ସଂଯୋଗ କରାଯିବ। ୨୦୨୦ ମାଟ୍ରିକ୍‌ ପରୀକ୍ଷାରେ ଆସିବାକୁ ଥିବା ପ୍ରଶ୍ନପତ୍ର ଢାଞ୍ଚାରେ ଅଭ୍ୟାସ ପାଇଁ ସବ୍‌ଜେକ୍‌ଟିଭ୍‌ ପ୍ରଶ୍ନ କରାଯାଇଛି। ଛାତ୍ରଛାତ୍ରୀ ତାହାକୁ ପ୍ରାକ୍ଟିସ୍‌ କରିବେ। ଶିକ୍ଷକମାନେ ମଧ୍ୟ ନୂଆ ଢାଞ୍ଚାରେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ କ୍ଲାସ୍‌ରେ ପଢ଼ାଇବା ଲାଗି ଗଣଶିକ୍ଷା ବିଭାଗ ପକ୍ଷରୁ କୁହାଯାଇଛି।