ଦିଲ୍ଲୀ,ଡିସେମ୍ବର 10 : ମୋଦି ସରକାରଙ୍କ ପ୍ରସ୍ତାବକୁ ପ୍ରତ୍ୟାଖାନ କରିଦେଇଛନ୍ତି ଚାଷୀ । ଧାନର ସର୍ବନିମ୍ନ ସହାୟକ ମୂଲ୍ୟ ଜାରି ରଖିବା ପାଇଁ ସରକାର ଲିଖିତ ଗ୍ୟାରେଂଟି ଦେବେ ବୋଲି ଜଣାଇବା ପରେ ମଧ୍ୟ ଚାଷୀ ଏହାକୁ ଗ୍ରହଣ କରି ନାହାନ୍ତି । ସରକାର ଦେଇଥିବା ପ୍ରସ୍ତାବରେ ପରିବର୍ତନ ସହ ଆଇନ ପ୍ରତ୍ୟାହାର ନେଇ ସହମତ ନହେବା ଯାଏଁ ଆନ୍ଦୋଳନରୁ ଚାଷୀ ହଟିବେ ନାହିଁ କି ସରକାରଙ୍କ ସହ କୌଣସି ଆଲୋଚନା ହେବନି ବୋଲି ସ୍ପଷ୍ଟ କରିଛନ୍ତି ।
ଆନ୍ଦୋଳନ ଆହୁରୀ ଜୋରଦାର କରିବା ପାଇଁ ସେମାନେ ଘୋଷଣା କରିଛନ୍ତି । ଦିଲ୍ଲୀକୁ ସମସ୍ତ ରାସ୍ତା ଗୋଟିଏ ପରେ ଗୋଟିଏ ବନ୍ଦ କରିବା ପାଇଁ ଚେତାବନୀ ଦେଇଛନ୍ତି । ଡିସେମ୍ବର ୧୪ ତାରିଖରେ ସାରା ଦେଶରେ ପ୍ରତିବାଦ କରିବା ପାଇଁ ଆହ୍ୱାନ ଦେଇଛନ୍ତି ଚାଷୀ । ଦିଲ୍ଲୀ, ହରିୟାଣା, ରାଜସ୍ଥାନ, ପଂଜାବରେ ଆଗକୁ ଏହି ଧାରଣା ପ୍ରତିବାଦ ଜୋରଦାର ହେବ ବୋଲି ଚେତାବନୀ ଦେଇଛନ୍ତି ଚାଷୀ ନେତା ।
ସେପଟେ ସିଂଘୁ ସୀମାରେ ଅଧିକ ସୁରକ୍ଷା ବଳ ମୁତୟନ କରାଯାଇଛି । ୧୨ ତାରିଖରେ ଦିଲ୍ଲୀକୁ ଯୋଡୁଥିବା ସମସ୍ତ ଜାତୀୟ ରାଜପଥ ଅବରୋଧ କରିବେ ଚାଷୀ । ଏହା ପରେ ୧୪ରେ ଦେଶବ୍ୟାପୀ ବିକ୍ଷୋଭ ସମାବେଶ କରାଯିବ ବୋଲି ଚେତାଇ ଦେଇଛନ୍ତି ଚାଷୀ ସଂଗଠନ । ଆନ୍ଦୋଳନକୁ ୧୮ରୁ ଅଧିକ ରାଜନୈତିକ ଦଳ ଏବଂ ୩୦ରୁ ଅଧିକ ଚାଷୀ ସଂଗଠନ ସମର୍ଥନ ଦେଇଥିବାରୁ ମୋଦି ସରକାରଙ୍କ ଅଡୁଆ ବଢି ଯାଇଛି ।
Prasanta Patnaik