ମିଳିଥିବା ପ୍ରାଥମିକ ସୂଚନା ମୁତାବକ, ବଡ଼ବିଲ୍ ଓଏମ୍ସି ବସ୍ତି ନିକଟରେ ଜଣେ ମହିଳାଙ୍କୁ ଗତକାଲି ରାତିରେ କିଛି ଦୁର୍ବୃତ୍ତ ମରଣାନ୍ତକ ଆକ୍ରମଣ କରିଥିଲେ । ଏକ ଧାରୁଆ ଛୁରୀରେ ତାଙ୍କ ବେକ କାଟି ଦେଇଥିଲେ । ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ବଡ଼ବିଲ୍ ମେଡ଼ିକାଲରେ ଭର୍ତ୍ତି କରାଯାଇଥିଲା । ଏହା ପରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । କିନ୍ତୁ ସେତେବେଳେ ମେଡ଼ିକାଲରେ ବିଦ୍ୟୁତ ନ ଥିଲା । ମାତ୍ର ମହିଳାଙ୍କର ତୁରନ୍ତ ଅପରେସନ୍ ମଧ୍ୟ ଜରୁରୀ ଥିଲା । ଫଳରେ ଡାକ୍ତର ମୋବାଇଲ ଲାଇଟ୍ ଯୋଗେ ଅପରେସନ୍ କରିବାକୁ ବାଧ୍ୟ ହୋଇଥିଲେ । ପରେ ମହିଳାଙ୍କୁ କଟକ ଏସ୍ସିବି ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଡାକ୍ତରଙ୍କୁ ବି ଏଠାରେ ସାବାସୀ ଦେବାକୁ ପଡ଼ିବ । ଯିଏ ଏତେ ବଡ଼ ବିପଦକୁ ମୁଣ୍ଡ ଉପରେ ନେଇ ମହିଳାଙ୍କ ଜୀବନ ବଞ୍ଚାଇ ଦେଇଥିଲେ । କିନ୍ତୁ ଏଭଳି ଘଟଣାର କୌଣସି ସୂଚନା ସିଡିଏମ୍ଓଙ୍କ ନିକଟରେ ନାହିଁ ।
ସେପଟେ ହସ୍ପିଟାଲରେ ଜେନେରେଟ୍ର ଅଛି ଯାହା ଅକାମୀ ହୋଇପଡ଼ିଛି । ସେହିପରି ଅଘୋଷିତ ବିଦ୍ୟୁତ କାଟ୍ ଯୋଗୁଁ ଇନ୍ଭୋଟର୍ ମଧ୍ୟ ଚାର୍ଜ ହୋଇପାରୁନାହିଁ । ସେଠାରେ ପ୍ରାୟ ୧୮ ଘଣ୍ଟା ପାଖାପାଖି ବିଦ୍ୟୁତ କାଟ୍ ହେଉଛି । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି । ପୂର୍ବରୁ ବିଦ୍ୟୁତ କାଟ୍ ନେଇ ବାରମ୍ବାର ଅଭିଯୋଗ ମଧ୍ୟ ହୋଇଛି । କିନ୍ତୁ କର୍ତ୍ତୃପକ୍ଷଙ୍କର ଏଥିପ୍ରତି ନିଘା ନାହିଁ ବୋଲି ଅଭିଯୋଗ ହୋଇଛି । ସେମାନେ ଆସନ୍ତାକାଲି ବିଦ୍ୟୁତ ବିଭାଗ କାର୍ଯ୍ୟାଳୟ ଘେରାଉ କରିବେ ବୋଲି ଚେତାବନୀ ଦେଇଛନ୍ତି ।
Prasanta Patnaik