କଟକ : ରାଜ୍ୟର ଏକମାତ୍ର ଚକ୍ଷୁ ରୋଗ ଆଞ୍ଚଳିକ ପ୍ରତିଷ୍ଠାନ (ଆର୍ଆଇଓ) ମାନ୍ୟତା ପାଇଥିବା ଏସ୍ସିବି ଚକ୍ଷୁ ବିଭାଗ ବର୍ତ୍ତମାନ କେବଳ ନାମକୁ ମାତ୍ର ଚାଲିଛି। ବିଭାଗର ଡାକ୍ତରମାନଙ୍କ ପାଇଁ ବସିବାକୁ ରୁମ୍ ନଥିବାବେଳେ ଆବଶ୍ୟକ ସ୍ଥାନ ଅଭାବରୁ ମଡୁଲାର ଓଟି ମଧ୍ୟ ଆରମ୍ଭ ହୋଇପାରୁନି। ଦୀର୍ଘ ଦିନ ଧରି କେତେକ ଅତ୍ୟାବଶ୍ୟକ ମେସିନ୍ ବିଭାଗକୁ ଆସିପାରୁନାହିଁ। ବିଭାଗର ଭିତ୍ତିଭୂମି ବିଗିଡି ଯାଇଥିବାରୁ ଏମ୍ସିଆଇ ମାନ୍ୟତା ପ୍ରତ୍ୟାହାର ହେବା ଆଶଙ୍କା ସୃଷ୍ଟି ହୋଇଛି। ହେଲେ ବିଭାଗର ପୁନରୁଦ୍ଧାର କେମିତି ହେବ ସେଥିପ୍ରତି କାହାର ଚିନ୍ତା ନାହିଁ।
ବର୍ତ୍ତମାନ ଚକ୍ଷୁ ବିଭାଗରେ ତିନି ବର୍ଷର ପାଖାପାଖି ୩୦ ପିଜି ଡାକ୍ତର ଅଭ୍ୟାସ କରୁଥିବାବେଳେ ପ୍ରଫେସର ୩ଜଣ, ଆସୋସିଏଟ୍ ପ୍ରଫେସର ୨ଜଣ, ଆସିଷ୍ଟାଣ୍ଟ ପ୍ରଫେସର ୧୦ ଜଣ ଓ ଏସ୍ଆର୍ ୨ଜଣ କାର୍ଯ୍ୟ କରୁଛନ୍ତି। ହେଲେ କୌଣସି ଜଣଙ୍କ ପାଇଁ ବି ବସିବାକୁ ରୁମ୍ଟିଏ ଦିଆଯାଇନାହିଁ। ଯାହାକି ଏମ୍ସିଆଇ ନିୟମ ବିରୁଦ୍ଧାଚରଣ କରୁଛି। ବିଭାଗୀୟ ମୁଖ୍ୟଙ୍କ ପାଇଁ ଉଦ୍ଦିଷ୍ଟ ରୁମ୍କୁ ଅଫିସ୍ ଭାବେ ବ୍ୟବହାର କରାଯାଉଛି। ତିନି ଜଣ ପ୍ରଫେସରଙ୍କ ମଧ୍ୟରୁ ଡାକ୍ତର ପି.କେ. ନନ୍ଦ କର୍ଣ୍ଣିଆ କ୍ଲିନିକ୍ରେ, ଡାକ୍ତର ଶୁଭବ୍ରତା ପରିଡ଼ା ରେଟିନା କ୍ଲିନିକ୍ରେ ଏବ˚ ଡାକ୍ତର ସୁମିତ୍ରା ମହାପାତ୍ର ଗ୍ଲୁକୋମା କ୍ଲିନିକ୍ରେ ବସୁଛନ୍ତି। କନିଷ୍ଠ ଡାକ୍ତରମାନଙ୍କ ବସାଉଠା କରିବା ପାଇଁ କମନ୍ରୁମ୍ ଟିଏ ନାହିଁ। ମଧ୍ୟାହ୍ନଭୋଜନ ସମୟରେ ଖାଇବା ପାଇଁ ଡାକ୍ତରୀ ଛାତ୍ରୀମାନେ ବିଭିନ୍ନ କ୍ଲିନିକ୍ରେ ବସିବାକୁ ବାଧ୍ୟ ହେଉଛନ୍ତି। ବର୍ତ୍ତମାନ ବିଭାଗରେ ଅପଥାଲ୍ମିକ୍ ଆସିଷ୍ଟାଣ୍ଟ ପ୍ରଶିକ୍ଷଣ ପାଠ୍ୟକ୍ରମ, ଅପ୍ଥାଲମିକ ସର୍ଜରୀ ଆସିଷ୍ଟାଣ୍ଟ ଓ ଅପଟ୍ରୋମାଟ୍ରିଷ୍ଟ ତାଲିମ ଦିଆଯାଉଛି। ପାଖାପାଖି ୪୦ଜଣ ଛାତ୍ରଛାତ୍ରୀ ତାଲିମ ନେଉଛନ୍ତି। କିନ୍ତୁ ବିଭାଗରେ ଟିଚି˚ ହଲ୍ ନଥିବାରୁ ପ୍ରଶିକ୍ଷାର୍ଥୀମାନେ ୧୫ନମ୍ବର ହଲ୍ (ପିଜି ସେମିନାର ହଲ୍)ରେ କାମଚଳା ଭାବେ ତାଲିମ ନେବାକୁ ବାଧ୍ୟ ହେଉଛନ୍ତି।
Prasanta Patnaik