ଶିତଳ ଷଷ୍ଠୀ ଉତ୍ସବ ପାଳିତ

କାମାକ୍ଷାନଗର : ଜିରାଳ ଗ୍ରାମ ଶ୍ରୀ ଶ୍ରୀ ଜଳେଶ୍ୱରଜୀଉ ଙ୍କ ମନ୍ଦିର ଠାରେ ପବିତ୍ର ଶିତଳ ଷଷ୍ଠୀ ଉତ୍ସବ ପାଳିତ ହୋଇଯାଇଛି । ଏହି ଉପଲକ୍ଷେ ସୁସଜ୍ଜିତ ମନ୍ଦିର ପରିସରରେ ଦେବ ଦେବ ମହାଦେବ ଶ୍ରୀ ଶ୍ରୀ ଜଳେଶ୍ୱର ଜୀଉଙ୍କ ସହିତ ମାତା ପାର୍ବତୀଙ୍କ ଦେବ ଶାସ୍ତ୍ର ମତେ ବିବାହ ଉତ୍ସବ ସମ୍ପନ୍ନ ହୋଇଯାଇଛି ।

ମନ୍ଦିରରେ ହୋମଯଜ୍ଞ, ନାମ ସଂକୀର୍ତ୍ତନ ସହିତ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥିଲା । କନ୍ୟା ପକ୍ଷ ପିତାମାତା ପ୍ରତିମା ମହାରଣା, କୃଷ୍ଣ ମହାରଣା ଓ ବରପକ୍ଷ ପିତାମାତ ଭାବେ ତ୍ରିବେଣୀ ସାହୁ, ବିଶ୍ୱନାଥ ସାହୁ ସହଯୋଗ କରିଥିଲେ । ବିବାହ ପୂର୍ବଦିନ ସକାଳ ସମୟରେ ପତ୍ର ପେଣ୍ଡି ଓ ଦେବ ନିମନ୍ତ୍ରଣ କାର୍ଯ୍ୟକ୍ରମ ପରେ ୧୭ ତାରିଖରେ ମୁଗ ବଡି ଓ ଦିଅ ମଙ୍ଗୁଳା ବ୍ୟବସ୍ଥା ହୋଇଥିଲା ।

ଦେବ ଦମ୍ପତ୍ତିଙ୍କର ଏହି ପବିତ୍ର ବିବାହ ଉତ୍ସବ ଦର୍ଶନ ପାଇଁ ଆଖପାଖ ଅଞ୍ଚଳରୁ ବହୁ ଶ୍ରଦ୍ଧାଳୁଙ୍କର ସମାଗମ ଲାଗି ରହିଥିଲା । ଜିରାଳ ଗ୍ରାମବାସୀଙ୍କ ତରଫରୁ ଶ୍ରୀ ଶ୍ରୀ ଜଳେଶ୍ୱର ଜୀଉ ମନ୍ଦିର କମିଟି ର ଗ୍ରାମ୍ୟ କମିଟି କର୍ମକର୍ତ୍ତା ଓ ସଭ୍ୟମାନେ ଉତ୍ସବ ପରିଚାଳନା କରିଥିଲେ ।