ଲୁଟ୍ ମୋବାଇଲ ଖରିଦ୍ ଅଭିଯୋଗରେ ଯୁବକ ଗିରଫ

ରାଉରକେଲା, ୩୦ା୮: ଲୁଟ୍ ମୋବାଇଲ ଖରିଦ୍ କରିବା ଅଭିଯୋଗରେ ଛେଣ୍ଡ ପୁଲିସ ହାତୀବାରି ଥାନା ଅନ୍ତର୍ଗତ ବୈଦ୍ୟନାଥପୁର ଗ୍ରାମର ଏମ୍ଡି ସକିଲ ନାମକ ଜଣେ ଯୁବକକୁ ପୁଲିସ ଗିରଫ କରିଛି । ସକିଲ ଠାରୁ ପୁଲିସ ଲୁଟ୍ ମୋବାଇଲ ଜବତ କରିବା ସହ ତାକୁ କୋର୍ଟ ଚାଲାଣ କରିଛି । ଛେଣ୍ଡ କଲୋନୀ କନକ ମଞ୍ଜରୀ ଫାର୍ମାସୀ କଲେଜ ନିକଟରେ ଲୁଟ୍ ଘଟଣା ଘଟିଥିଲା । ଛେଣ୍ଡ କଲୋନୀ ଏମ୍/୭୮ରେ ରହୁଥିବା ତ୍ରୈଲୋକ୍ୟନାଥ ପୃଷ୍ଟି ଗତ ୨୯ ତାରିଖ ରାତି ପ୍ରାୟ ୯ଟା ବେଳେ କଳିଙ୍ଗ ବିହାର ଆଡ଼ୁ ଚାଲି ଚାଲି ଘରକୁ ଫେରୁଥିଲେ ।

ଏହି ସମୟରେ ଏକ କଲ୍ ଆସିବାରୁ ସେ ମୋବାଇଲରେ କଥା ହୋଇଥିଲେ । ଗୋପବନ୍ଧୁପାଲି ଅଞ୍ଚଳର ଦୀପକ ସିଂହ, ସେକ ଓ ବଣ୍ଟି ଏକ ଆପାଚି ମୋଟର ସାଇକେଲରେ ଆସି ଶ୍ରୀ ପୃଷ୍ଟିଙ୍କ ହାତରୁ ମୋବାଇଲ ଲୁଟି ନେଇ ଚମ୍ପଟ୍ ମାରିଥିଲେ । ପ୍ରାୟ ୧୫ ହଜାର ଟଙ୍କା ମୂଲ୍ୟର ଏହି ସାମସଙ୍ଗ ମୋବାଇଲକୁ ଦୀପକ ହାତୀବାରି ଥାନା ଅନ୍ତର୍ଗତ ବୈଦ୍ୟନାଥପୁରର ସକିଲକୁ ବିକ୍ରି କରି ଦେଇଥିଲା । ଶ୍ରୀ ପୃଷ୍ଟିଙ୍କ ଅଭିଯୋଗ ଆଧାରରେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା । ମୋବାଇଲ ଟ୍ରାକିଂ ବେଳେ ସକିଲ ଧରା ପଡ଼ିଥିଲା । ପୁଲିସ ତାକୁ କୋର୍ଟ ଚାଲାଣ କରିଛି । କୋର୍ଟରେ ଜାମିନ ଖାରଜ ହୋଇଯାଇଛି ।