ମୁଖ୍ୟମନ୍ତ୍ରୀଙ୍କୁ ପୁରୀରେ ଜୋରଦାର ବିରୋଧ, ଟମାଟୋ ମାଡକୁ କଳାପତାକା ଦେଖାଇଲେ, ସାରା ରାଜ୍ୟରେ ବିରୋଧ ପାଇଁ ଚେତାବନୀ

ଆଜି ରଥଯାତ୍ରା ପାଇଁ ଶେଷ ସମନ୍ବୟ କମିଟି ବୈଠକରେ ଯୋଗଦେବା ପାଇଁ ମୁଖ୍ୟମନ୍ତ୍ରୀ ପୁରୀ ଗସ୍ତରେ ଯାଇଥିବା ସମୟରେ ଚକ୍ରତୀର୍ଥ ରୋଡରେ ତାଙ୍କୁ କଳାପତାକା ଦେଖାଇବା ସହ ଟମାଟୋ ମାଡ ହୋଇଥିବାର ଅଭିଯୋଗ ହୋଇଛି  । ତେବେ ମୁଖ୍ୟମନ୍ତ୍ରୀଙ୍କ ଗସ୍ତକୁ ଆଖି ଆଗରେ ରଖି ପୋଲିସ ଆଗୁଆ ବିଭିନ୍ନ ଦଳର କର୍ମୀ ଓ ନେତାଙ୍କ ଗିରଫ କରିଥିବା ବେଳେ ଏବେ କିଏ ଟମୋଟୋ ମାଡ କଲା ଏହାକୁ ନେଇ ପ୍ରଶ୍ନ ଉଠିଛି  । ବିଜେପି କହିଛି ଦଳ ହିଂସାରେ ବିଶ୍ବାସ କରେ ନି  । ତେବେ କଂଗ୍ରେସରେ ଭିନ୍ନମତ ପ୍ରକାଶ ପାଇଛି  । ପିସିସି ସଭାପତି ନିରଞ୍ଜନ ପଟ୍ଟନାୟକ ଗଣମାଧ୍ୟମରେ ଗୋଟିଏ କଥା କହୁଥିବା ବେଳେ ବିରୋଧୀ ଦଳ ମୁଖ୍ୟ  ସଚେତକ ତାରା ପ୍ରସାଦ ବାହିନୀପତି ଆଉ ଗୋଟିଏ କଥା କହୁଛନ୍ତି  । ତେବେ ପୁରୀରୁ ଆରମ୍ଭ ହୋଇଥିବା ଏହିପରି ବିରୋଧ ରାଜ୍ୟବ୍ୟାପୀ ହୋଇପାରେ ବୋଲି ଶ୍ରୀ ବାହିନୀପତି ଆଶଙ୍କା କରି ଗଣମାଧ୍ୟମରେ ନିଜର ମତ ଉପସ୍ଥାପନ କରିଛନ୍ତି  ।

ଏଠାରେ ସୂଚନାଯୋଗ୍ୟ ଯେ ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ପ୍ରସଙ୍ଗକୁ ନେଇ ସାରା ରାଜ୍ୟରେ ପ୍ରତିବାଦ ପ୍ରକାଶ ପାଇଥିଲା  । ଏହି ଘଟଣାରେ କମିଶନ ତଦନ୍ତ ନିର୍ଦ୍ଦେଶ ଦେଇ ମୁଖ୍ୟମନ୍ତ୍ରୀ ଚୁପ ହୋଇ ବସିବା ପ୍ରତିବାଦରେ ଏପରି ବିରୋଧ ପ୍ରଦର୍ଶନ ହୋଇଥିବା ଏବେ ପୁରୀ ସହରରେ ଚର୍ଚ୍ଚାର ବିଷୟ ସାଜିଛି  ।