ଟିଟୋ ଲିଙ୍କ୍ ସୃଷ୍ଟି କଲା ଅଡୁଆ, ଚର୍ଚ୍ଚାରେ ନୂଆ ମୁହଁ, ବଡଚଣା ରାଜନୀତି ନୂଆ ସମୀକରଣ ମୁହାଁ

ଚଣ୍ଡିଖୋଲ, ୨୯ ସେପ୍ଟେମ୍ବର :ବଦଳୁଛି ବଡଚଣା ବିଜେଡି ରାଜନୀତି ସମୀକରଣ । ସ୍ଥାନୀୟ ବିଧାୟକ ଅମର ପ୍ରସାଦ ଶତପଥୀଙ୍କ ଉପରେ ହାଇକମାଣ୍ଡ ଖପ୍ପା । ଏହି କ୍ରମରେ ଚଳିତଥର ଶ୍ରୀ ଶତପଥୀ ପ୍ରାର୍ଥୀ ହେବେ କି ନାହିଁ ଏହାକୁ ନେଇ ସାଧାରଣରେ ସୃଷ୍ଟି ହୋଇଛି ବଡ ପ୍ରଶ୍ନ । ଏପରିକି ବଡଚଣା ବିଧାୟକଙ୍କର ଗ୍ୟାଙ୍ଗଷ୍ଟାର ଟିଟୋ ସହ ସମ୍ପର୍କ ରହିଥିବା ନେଇ ଅଭିଯୋଗ କରିଥିଲା ସ୍ଥାନୀୟ କଂଗ୍ରେସ । କେବଳ ସେତିକି ନୁହେଁ କଂଗ୍ରେସ ପକ୍ଷରୁ ତଦନ୍ତକାରୀ ସଂସ୍ଥାର ଅଧିକାରୀଙ୍କୁ ସାକ୍ଷାତ କରିବା ସହ ଚଣ୍ଡିଖୋଲ ଠାରେ ମଧ୍ୟ  ପ୍ରତିବାଦ ସମାବେଶ କରାଯାଇଥିଲା । ଏହି ଖବର ହାଇକମାଣ୍ଡଙ୍କ ପାଖରେ ପହଁଚିବା ପରେ ବିଧାୟକଙ୍କ ଉପରେ ଏବେ ବିଜେଡି ଖପ୍ପା । ତାଙ୍କ ସ୍ଥାନରେ ଜଣେ ନବାଗତ ଲୋକଙ୍କୁ  ଦଳ ଏଠାରେ ମୁହଁ କରିବା ପାଇଁ ପ୍ରୟାସ କରିଛନ୍ତି । ଏ ସବୁ ମଧ୍ୟରେ ଜଣେ ସାମ୍ବାଦିକଙ୍କ ନାଁ ବିଶେଷ ଚର୍ଚ୍ଚାରେ ରହିଛି । ଏପରିକି ତାଙ୍କୁ ଏରିଆରେ ସଙ୍ଗଠନ କରିବା ପାଇଁ ହାଇକମାଣ୍ଡ ସବୁଜସଂଙ୍କେତ ଦେଇଥିବା କଥା ବିଶେଷ ସୁତ୍ରରୁ ଜଣାପଡିଛି ।