ଭୁବନେଶ୍ୱର (ଶିବଶଙ୍କର ଓଝା): ଆଜି ପାଟକୁରା ନିର୍ବାଚନ ମଣ୍ଡଳୀର ଡେରାବିଶ ଛତାହାଟ ଗାଆଁରେ ଭାରତୀୟ ଜନତା ପାର୍ଟି ପକ୍ଷରୁ ଆୟୋଜିତ ସଭା ମଞ୍ଚରେ ଓଲିଉଡର ସୁପରଷ୍ଟାର୍ ବାବୁସାନଙ୍କୁ ଦେଖିବାକୁ ମିଳିଛି। ଏହି ସଭାରେ ବିଜେପିର ଲୋକସଭା ପ୍ରାର୍ଥୀ ବୈଜୟନ୍ତ ପଣ୍ଡା ଏବଂ ପାଟକୁରା ନିର୍ବାଚନ ମଣ୍ଡଳୀର ବିଜେପି ବିଧାୟକ ପ୍ରାର୍ଥୀ ବିଜୟ ମହାପାତ୍ର ଉପସ୍ଥିତ ଥିଲେ।
ତେବେ ବାବୁସାନ୍ ତ ବିଜେପିରେ ନାହାନ୍ତି ,ତେବେ ଏହି ସଭାରେ ସେ କାହିଁକି ଯୋଗ ଦେଇଥିଲେ। ହଁ, ବାବୁସାନଙ୍କ ମାଆ ତଥା ଲୋକପ୍ରିୟ ଅଭିନେତ୍ରୀ ଅପରାଜିତା ମହାନ୍ତି ଭୁବନେଶ୍ୱର ଉତ୍ତର ଆସନରୁ ବିଜେପିର ବିଧାନସଭା ପ୍ରାର୍ଥୀ ହୋଇଛନ୍ତି। ବିଜେପିର ଲୋକସଭା ପ୍ରାର୍ଥୀ ବୈଜୟନ୍ତ ପଣ୍ଡାଙ୍କ ଅନୁରୋଧ କ୍ରମେ ସେହି ସଭାକୁ ଆସିଥିଲେ ବାବୁସାନ୍। ଏକଥା ସେ ନିଜେ ସଭା ମଞ୍ଚରେ ଘୋଷଣା କରିଛନ୍ତି।
ଏଠାରେ ସ୍ମରଣ ଯୋଗ୍ୟ ଯେ ବାବୁସାନ ବୈଜୟନ୍ତ ପଣ୍ଡାଙ୍କ ପାରିବାରିକ ପ୍ରଯୋଜନା ସଂସ୍ଥା ତରଙ୍ଗ ସିନେ ପ୍ରଡକ୍ସନ୍ସ ଦ୍ୱାରା ପ୍ରଯୋଜିତ ଛଅଟି ସିନେମା ‘ଲଭ୍ ଷ୍ଟେସନ୍’, ‘ଲଭ୍ ପାଇଁ କୁଛ୍ ଭି କରେଗା’, ‘ସିଷ୍ଟର ଶ୍ରୀଦେବୀ’, ‘ହିରୋ ନଂ ୱାନ୍’, ‘ସୁନ୍ଦରଗଡ଼ର ସଲମାନ୍ ଖାନ୍’ଏବଂ ‘ଶ୍ରୀମାନ୍ ସୁରଦାସ’ରେ ନାୟକ ଭୂମିକାରେ ଅଭିନୟ କରିଛନ୍ତି। ଅପରପକ୍ଷରେ ଅନୁଭବ ତରଙ୍ଗ ସିନେ ପ୍ରଡକ୍ସନ୍ସ ଦ୍ୱାରା ପ୍ରଯୋଜିତ ଚାରିଟି ସିନେମା ‘ଗପ ହେଲେ ବି ସତ’ , ‘ଜଗା ହାତରେ ପଘା’, ‘ଅଭୟ’ ଓ ‘ପ୍ରେମ କୁମାର:ସେଲ୍ସମ୍ୟାନ୍ ଅଫ୍ ଦ ଇୟର’ରେ ନାୟକ ଭୂମିକାରେ ଅଭିନୟ କରିଥିଲେ।
Prasanta Patnaik