ମାଲକାନଗିରି : ଜିଲ୍ଲା ପ୍ରଶାସନର ପ୍ରତିଶ୍ରୁତି ପରେ ମାଲକାନଗିରି ଚିତ୍ରକୋଣ୍ଡା ଅଞ୍ଚଳର ଆଦିବାସୀ ଆନ୍ଦୋଳନରୁ ଓହରି ଯାଇଛନ୍ତି । ମୌଳିକ ସୁବିଧା ମିଳୁ ନ ଥିବା ପ୍ରତିବାଦରେ ଆଜି ମାଲକାନଗିରି ଜିଲ୍ଲାପାଳଙ୍କ ଅଫିସ ଘେରାଉ ପାଇଁ ସେମାନେ ଚିତ୍ରକୋଣ୍ଡାରେ ପହଞ୍ଚିଥିଲେ। ହେଲେ ସେଠାରେ ସେମାନଙ୍କୁ ଉପଜିଲ୍ଲାପାଳ, ଏସ୍ପି ଅଟକାଇ ବୁଝାସୁଝା କରିଥିଲେ । ଖୁବ୍ ଶୀଘ୍ର ସେମାନଙ୍କ ସମସ୍ତ ଦାବି ପୂରଣ ସହ ମୌଳିକ ସୁବିଧା ଯୋଗାଇ ଦେବାର ବ୍ୟବସ୍ଥା କରାଯିବ ବୋଲି ଉପଜିଲ୍ଲାପାଳ ରାମେଶ୍ୱର ପ୍ରଧାନ ପ୍ରତିଶ୍ରୁତି ଦେଇଥିଲେ। ଏହାପରେ ଆନ୍ଦୋଳନରୁ ଓହରିଛନ୍ତି ସ୍ୱାଭିମାନ ଅଞ୍ଚଳ ବାସିନ୍ଦା ।
ସ୍ୱାଭିମାନ ଅଞ୍ଚଳର ୫ଟି ପଞ୍ଚାୟତ ଯଥା ଯନ୍ତ୍ରି, ପଣସପୁଟ, ଯୋଡାମ୍ବ, ଅଣ୍ଡରାପାଲି ଏବଂ ଗାଜଲବାଡ଼ି ବାସିନ୍ଦା ଅଦ୍ୟାବଧୀ ମୌଳିକ ସୁବିଧାରୁ ବଞ୍ଚିତ ରହି ଦୟନୀୟ ଜୀବନ କାଟୁଛନ୍ତି। ପ୍ରଶାସନର ସେମାନଙ୍କ ପ୍ରତି ଦରଦ ନ ଥିବା ହୃଦୟଙ୍ଗମ କରି ନିଜ ହକ୍ ଲାଗି ସେମାନେ ଅଣ୍ଟା ଭିଡ଼ିଛନ୍ତି।
ଗତକାଲି ସ୍ୱାଭିମାନ ଅଞ୍ଚଳର ବାସିନ୍ଦା ୪ଟି ଲଞ୍ଚ ଓ ଦେଶୀ ଡଙ୍ଗାରେ ନଦୀ ପାର୍ ହୋଇ ଚିତ୍ରକୋଣ୍ଡାରେ ରାତ୍ରୀଯାପନ କରିଥିଲେ। ହେଲେ ପ୍ରତିଶ୍ରୁତି ପରେ ଆଜି ଆନ୍ଦୋଳନରୁ ହଟିଛନ୍ତି ସ୍ୱାଭିମାନ ଅଞ୍ଚଳବାସୀ ।
ଗତ ଜୁନ୍ ୫ ତାରିଖରେ ବିକାଶ ଆଉ ଅଧିକାର ଦାବିରେ ସ୍ୱର ଉତ୍ତୋଳନ ପାଇଁ ଏକଜୁଟ୍ ହୋଇଥିଲେ ସମସ୍ତେ । ସେହି ସମୟରେ ସରକାର ଏବଂ ପ୍ରଶାସନ ବିରୋଧରେ ଆରପାର ଲଢ଼େଇ ପାଇଁ ଚେତାବନୀ ଦେଇଥିଲେ ।
Prasanta Patnaik