ଜଗତସିଂହପୁର/କୁଜଙ୍ଗ : ଆସନ୍ତା ୭ ତାରିଖ ଦିନ ଏକ ନୂଆ ରାଜନୈତିକ ଦଳ ଗଠନ କରାଯିବ। ନୂତନ ଦଳର ପ୍ରଥମ ସମାବେଶ ବାରିପଦାଠାରେ ହେବ। ଏହାପରେ କଟକ ଓ କୁଜଙ୍ଗଠାରେ ସମାବେଶ ଆୟୋଜନ କରାଯିବ। ନିଜର ସମର୍ଥକମାନଙ୍କୁ ଆଜି ଏହିଭଳି ସୂଚନା ଦେଇଛନ୍ତି ବିଜେଡିରୁ ବହିଷ୍କୃତ ନେତା ତଥା ପାରାଦୀପର ବିଧାୟକ ଡା. ଦାମୋଦର ରାଉତ।
ଗତକାଲି ନିଜ ନିର୍ବାଚନମଣ୍ଡଳୀରେ ବିେଜଡି ପକ୍ଷରୁ ବିଶାଳ ମହିଳା ସମାବେଶର ଆୟୋଜନ ପରେ ବିଧାୟକ ଡା. ରାଉତ ଆଜି କୁଜଙ୍ଗଠାରେ ନିଜ ସମର୍ଥକଙ୍କୁ ଭେଟିଥିଲେ। ବୈଠକରେ ତାଙ୍କର ଏକାନ୍ତ ଅନୁଗତମାନେ ଏକାଠି ହୋଇଥିଲେ। ସେଠାରେ ସେ ନୂତନ ଦଳ ଗଠନ ସମ୍ପର୍କରେ ସୂଚନା ଦେଇଥିଲେ। ଆହୁରି ମଧ୍ୟ ସ୍ପଷ୍ଟ କରିଥିଲେ ଯେ ନୂତନ ଦଳର ପ୍ରଥମ ସମାବେଶ ବାରିପଦା, ଦ୍ବିତୀୟ କଟକ ଓ ତୃତୀୟ କୁଜଙ୍ଗରେ ଆୟୋଜନ କରାଯିବ। ବିଜେଡିରୁ ବହିଷ୍କୃତ ପୂର୍ବତନ ସାଂସଦ ବୈଜୟନ୍ତ ପଣ୍ଡା, ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡ଼େଇ, ରାମକୃଷ୍ଣ ପଟ୍ଟନାୟକ, ସୁରେନ୍ଦ୍ର ନାୟକଙ୍କ ଭଳି ନେତାଙ୍କୁ ଏଥିରେ ସାମିଲ କରାଯିବ। ପୂର୍ବତନ ମନ୍ତ୍ରୀ ବିଜୟ ମହାପାତ୍ରଙ୍କ ସହ ଆଲୋଚନା କରାଯାଇଥିଲେ ମଧ୍ୟ ସେ ବର୍ତ୍ତମାନ ସୁଦ୍ଧା କୌଣସି ସ୍ପଷ୍ଟ ଉତ୍ତର ରଖିନାହାନ୍ତି ବୋଲି ସେ କହିଥିଲେ।
Prasanta Patnaik