ସଡ଼କ ଦୁର୍ଘଟଣାରେ ୨ ଜଣଙ୍କ ମୃତ୍ୟୁ

ରାଉରକେଲା, ୧୭/୭  : ୧୪୩ ନଂ ଜାତୀୟ ରାଜପଥରେ ଦୁଇଟି ସଡ଼କ ଦୁର୍ଘଟଣାରେ ୨ଜଣଙ୍କ ମୃତ୍ୟୁ ହୋଇଛି । ପାୱାର ହାଉସ୍ ରୋଡ୍ସ୍ଥିତ ପାଢ଼ୀ କଲୋନୀରେ ସଞ୍ଜୀତ ପାଢ଼ୀ ପରିବାର ସହ ବାସ କରନ୍ତି । ସେ ଦେଓଗାଁ ହାଇସ୍କୁଲରେ ଗଣିତ ଶିକ୍ଷକ ଭାବ ପାଠ ପଢ଼ାନ୍ତି । ଗତକାଲି ସନ୍ଧ୍ୟାରେ ତାଙ୍କର ଜଣେ ବନ୍ଧୁଙ୍କ ପୁଅ ବାହାଘର ଭୋଜିଖାଇ ଦେଓଗାଁ ଯାଇଥିଲେ ।

ରାତି ୧୦ଟାରେ ଭୋଜି ଖାଇ ଫେରୁଥିବା ସମୟରେ ଦେଓଗାଁ ସ୍ଲାଗ୍ ଗେଟ ସମ୍ମୁଖରେ ଏକ ହାଇୱା ତାଙ୍କୁ ପଛପଟୁ ଧକ୍କାଦେଇ ଫେରାର ହୋଇଯାଇଥିଲା । ଫଳରେ ସେ ରାସ୍ତା ଉପରେ ଛିଟିକି ପଡ଼ିଥିବା ବେଳେ ତାଙ୍କ ମୁଣ୍ଡରେ ଆଘାତ ଲାଗିଥିଲା । ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଚିକିତ୍ସାଲାଗି ଆରଜିଏଚ୍ରେ ଭର୍ତ୍ତି କରିଥିଲେ ।

ସେଠାରେ ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଛି । ସେହିଭଳି ଆଜି ସକାଳ ସାଢ଼େ ୯ଟା ସମୟରେ ଅନ୍ୟ ଏକ ଦୁର୍ଘଟଣାରେ ଅନ୍ୟଜଣଙ୍କର ମୃତ୍ୟୁ ଘଟିଛି । ଦେଓଗାଁ ତଳବାଲଝୁଡ଼ି ବସ୍ତିରେ ଉଷା ପ୍ରଧାନ ପରିବାର ସହ ବାସ କରନ୍ତି । ତାଙ୍କ ଦେହ ଅସୁସ୍ଥ ଥିବାରୁ ସେ ତାଙ୍କ ପୁଅ ସାଗର ପ୍ରଧାନଙ୍କ ସହ ଇଏସ୍ଆଇ ଡାକ୍ତରଖାନାକୁ ବାଇକ୍ ନଂ (ଓଡ଼ି-୧୫ଜି୦୭୫୩) ଯୋଗେ ଯାଉଥିଲେ ।

ଗାନ୍ଧି କଲେଜ ସମ୍ମୁଖରେ ଏକ ଡମ୍ପର ଧକ୍କା ଦେବାରୁ ପୁଅ ରାସ୍ତା ଉପରେ ଛିଟିକି ପଡ଼ିଥିବା ବେଳେ ମା’ ଉଷାଙ୍କର ମୁଣ୍ଡ ଉପରେ ଡମ୍ପର ଚକା ଚଢ଼ି ଯାଇଥିଲା । ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା । ସାଗରଙ୍କୁ ଆରଜିଏଚ୍ରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ପୁଲିସି ଶବ ଜବତ କରି ଘଟଣାର ତଦନ୍ତ କରୁଛି ।