ସତର୍କ: ମୋମୋ ଗେମ୍ ଠାରୁ ପିଲାଙ୍କୁ ଦୂରେଇ ରଖନ୍ତୁ ଅଭିଭାବକ, ଆଡଭାଇଜରୀ ଜାରୀ କଲା କ୍ରାଇମବ୍ରାଞ୍ଚ

ବ୍ଲୁ ହ୍ୱେଲ୍ ଗେମ୍ ପରେ ବର୍ତ୍ତମାନ ‘ମୋମୋ ଗେମ୍’ ନେଇ ବିଶ୍ୱରେ ଆତଙ୍କ ଦେଖାଯାଇଛି। ରାଉରକେଲାର ଜଣେ ଇଞ୍ଜିନିୟର ଛାତ୍ର ଛଅ ମହଲାରୁ ଡେହିଁ ଆତ୍ମହତ୍ୟା କରିବା ପରେ ଏ ନେଇ ତତ୍ପରତା ପ୍ରକାଶ କରିଛି ଓଡ଼ିଶା ପୋଲିସ। ଏଥି ନେଇ କ୍ରାଇମବ୍ରାଞ୍ଚ ପକ୍ଷରୁ ଶନିବାର ଆଡଭାଇଜରି ଜାରୀ କରାଯାଇଛି ।

ମୋମୋ ଗେମ୍ ଠାରୁ ପିଲାଙ୍କୁ ଦୂରରେ ରହିବା ପାଇଁ ଅଭିଭାବକଙ୍କୁ ସତର୍କ ରହିବାକୁ କ୍ରାଇମବ୍ରାଞ୍ଚ୍ ପରାମର୍ଶ ଦେଇଛି । ନିଜ ପିଲାଙ୍କ ଗତିବିଧି ଉପରେ ନଜର ରଖିବା ସହ ପିଲାଙ୍କ ଚାଲି ଚଳନ ଓ ଗତିବିଧିକୁ ଠିକରେ ଅନୁଧ୍ୟାନ କରିବାକୁ କ୍ରାଇମବ୍ରାଞ୍ଚ ପକ୍ଷରୁ ପରାମର୍ଶ ଦିଆଯାଇଛି।ସେହିପରି ପିଲାଙ୍କ ସୋସିଆଲ ମିଡିଆ ଆକାଉଣ୍ଟ, ଇମେଲ ପ୍ରଭୁତି ଚେକ୍ କରିବାକୁ ଉକ୍ତ ଆଡଭାଇଜରୀରେ କୁହାଯାଇଛି ।

ଏହା ବ୍ୟତୀତ କ୍ରାଇମବ୍ରାଞ୍ଚ କହିଛି, ଆପଣଙ୍କ ହ୍ୱାଟସ୍ଆପ୍ ନମ୍ବରକୁ ଅଜଣା ଲିଙ୍କ୍ ଆସିଲେ ତାହାକୁ ଡିଲିଟ୍ କରନ୍ତୁ। ଅଜଣା ନମ୍ବରରୁ ମେସେଜ ଆସିଲେ ପ୍ରତିଉତ୍ତର ଦିଅନ୍ତୁ ନାହିଁ । ଗେମ ଖେଳିବାକୁ ମେସେଜ ଆସିଥିବା ନମ୍ବରକୁ ବ୍ଲକ କରିଦେବାକୁ ଉକ୍ତ ଆଡଭାଇଜରୀରେ ପରାମର୍ଶ ଦିଆଯାଇଛି ।