ଲଦାଖରେ ପ୍ରବଳ ଥଣ୍ଡାକୁ ଫିକା ପକାଇ ଦେଇଛି ଅଂଚଳବାସୀଙ୍କ ଭଲପାଇବା- ନରେନ୍ଦ୍ର ମୋଦୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଶ୍ରୀନଗର ଗସ୍ତ କରିଛନ୍ତି । ଏଥି ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରି ଦିଆଯାଇଛି । ମୋଦୀଙ୍କ ଏହି ସମ୍ବେଦନଶୀଳ ଗସ୍ତ ସମୟରେ ଆତଙ୍କବାଦୀ ଘଟଣା ଯେଭଳି ନଘଟିବ ଏଥି ପାଇଁ ସେନା ନଜର ରଖିଛି । ସମ୍ବେଦନଶୀଳ ସ୍ଥାନରେ ତଲାସି ଅଭିଯାନ ଜାରି ରହିଛି ।

ମୋଦୀ ଲଦାଖୀ ଭାଷାରେ ନିଜ ଭାଷଣ ଆରମ୍ଭ କରିଥିଲେ । ସେ କହିଥିଲେ କି ଲଦାଖର ଏହି ପ୍ରବଳ ଥଣ୍ଡା ସମୟରେ ଏଠାକୁ ପ୍ରଥମ ଥର ପାଇଁ ଆସିଛନ୍ତି  । କିନ୍ତୁ ଲୋକଙ୍କ ସ୍ନେହକୁ ଦେଖି ଏଠାରେ ଗରମ ଲାଗୁଛି । କୌଣସୀ ଥଣ୍ଡାର ପ୍ରଭାବ ଦେଖାଯାଉ ନାହିଁ ।

ପ୍ରଧାନମନ୍ତ୍ରୀ କୁଶୋକ ବକୁଲା ରିମପୋଚୀରେ ବିମାନବନ୍ଦରର ନୂତନ ଟର୍ମିନାଲର ଶିଳାନ୍ୟାସ କରିଥିଲେ । ୧୮,୯୮୫ ବର୍ଗ ମିଟରରେ ତିଆରି ହୋଇଥିବା ଏହି ଟର୍ମିନାଲ ଏକ ଅତ୍ୟାଧୁନିକ ଟର୍ମିନାଲ । ଏହାସହ ସେଠାରେ ପର୍ଯ୍ୟଟକ ଏବଂ ଟ୍ରେକିଙ୍ଗ ମାର୍ଗର ଶୁଭାରମ୍ଭ ହୋଇଛି । ଫଳରେ ଲଦାଖରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ଘଟିବ । ନୂତନ ରୋଜଗାର ମଧ୍ୟ ସୃଷ୍ଟି ହେବ । ଏହି ସମୟରେ ଜମ୍ମୁ-କାଶ୍ମୀରର ରାଜ୍ୟପାଳ ସତ୍ୟପାଲ ମଲିକ ମଧ୍ୟ ଉପସ୍ଥିତ ଥିଲେ । ମୋଦୀ ଲଦାଖର ବେଶଭୂଷାରେ ମଂଚ ଉପରକୁ ଯାଇଥିଲେ । ସେଠାରେ ଲଦାଖବାସୀ ମୋଦୀଙ୍କୁ ତାଳିମାରି ସ୍ୱାଗତ କରିଥିଲେ ।

ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ମୋଦୀ ଲେହ ଏବଂ ଜମ୍ମୁରେ ଉପସ୍ଥିତ ରହିବା ପରେ ଅପରାହ୍ନରେ ଶ୍ରୀନଗରସ୍ଥିତ ଶେର-ଏ-କଶ୍ମୀର ଇଣ୍ଟରନ୍ୟାସନାଲ କନଭେନସନ ସେଣ୍ଟରରେ ଅପରାହ୍ନ ୨ଟା ୫୫ ମିନିଟରେ ପହଂଚିବେ । ସେଠାରେ ସେ ବାନ୍ଦିପୁରା ରୁରଲ ବିପିଓକୁ ଉଦଘାଟନ କରିବା ପରେ ୫୪ ମେଡିକାଲ କଲେଜ, ୧୧ ପ୍ରଫେସନାଲ କଲେଜ, ମହିଳା ବିଶ୍ୱବିଦ୍ୟାଳୟ, ଏମ୍ସ ଅବନ୍ତୀପୁରା ପୁଲବାମାର ଶିଳାନ୍ୟାସ କରିବେ । ଏଥି ସହିତ ମୋଦୀ ରାଜ୍ୟର ବିକାଶ ପାଇଁ ଆହୁରି କିଛି ଘୋଷଣା କରି ପାରନ୍ତି ।