ରାଉରକେଲା, ୮ା୯ : ମୋଟର ସାଇକେଲ ଚୋରି ଅଭିଯୋଗରେ ସେକ୍ଟର-୧୫ ପୁଲିସ ଏକ ନାବାଳକ ଚୋର ଦଳକୁ ଗିରଫ କରିଛି । ସେମାନଙ୍କ ଠାରୁ ୩ଟି ଚୋରି ମଟର ସାଇକେଲ ଜବତ କରିଛି । ଗିରଫ ନାବାଳକଙ୍କୁ ବାଳସୁଧାର ଗୃହକୁ ପଠାଇ ଦିଆଯାଇଛି । ସେକ୍ଟର-୧୬ର ସି/୯୫ରେ ରହୁଛନ୍ତି କ୍ରିଷ୍ଣା ଠାକୁର । ଗତ ୪ ତାରିଖ ସନ୍ଧ୍ୟା ବେଳେ କ୍ରିଷ୍ଣା ତାଙ୍କର ଦୁଇଟି ହୋଣ୍ଡା ଆକ୍ଟିଭା ଗାଡ଼ି ଘର ଆଗରେ ରଖି ଘର କାମରେ ବ୍ୟସ୍ତ ରହିଥିଲେ । ତେବେ କିଛି ସମୟ ପରେ ଘର ସମ୍ମୁଖରେ ଗାଡ଼ି ନଥିବା ଦେଖିଥିଲେ ।
ଦୁଇଟି ଯାକ ଗାଡ଼ି ନଥିବାରୁ ସେ ବିବ୍ରତ ହେବା ସହ ଥାନାରେ ଗାଡି ଚୋରି ସମ୍ପର୍କରେ ଅଭିଯୋଗ କରିଥିଲେ । ପୁଲିସ ତୁରନ୍ତ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲା । ସେହି ଦିନ ସେକ୍ଟର-୧୬ରେ ରହୁଥିବା ପ୍ରଭାତ ନାୟକଙ୍କ ଏକ ହିରୋ ହୋଣ୍ଡା ଗ୍ଲାମର ମୋଟର ସାଇକେଲ ଚୋରି ହୋଇ ଯାଇଥିଲା । ପୁଲିସ ବିଭିନ୍ନ ସ୍ଥାନରେ ଖୋଜା ଖୋଜି କରୁଥିବା ବେଳେ ହମିରପୁର ଗିିରିଧାରୀ ବସ୍ତିରେ ୨/୩ଟି ଚୋରି ଗାଡ଼ି ରହିଥିବା ସୂଚନା ପାଇଥିଲା । ତେଣୁ ସେଠାରେ ପୁଲିସ ଚଢ଼ଉ କରି ଦୁଇଟି ହୋଣ୍ଡା ଆକ୍ଟିଭା ଓ ଗୋଟିଏ ହିରୋ ହୋଣ୍ଡା ମୋଟର ସାଇକେଲ ଜବତ କରିଥିଲା । ଚୋରି ଘଟଣାରେ ପୁଲିସ ସେକ୍ଟର-୧୬ ବସ୍ତି, ସେକ୍ଟର-୨୦ ରାମଗଡ଼ ବସ୍ତି, ଖେତାନୀ ବସ୍ତିର ୫ ଜଣ ନାବାଳକଙ୍କୁ ଗିରଫ କରିଛି ।
Prasanta Patnaik