ମହାନଦୀ ପରେ ବ୍ରାହ୍ମଣୀକୁ ବିପଦ : ଝାଡ଼ଖଣ୍ଡ ୧୫ ବନ୍ଧ କଲାଣି, ଆହୁରି ୩ ହେବ

ଖୋଦ୍ ରାଜ୍ୟ ସରକାରଙ୍କ ଜଳସଂପଦ ବିଭାଗ ବିଧାନସଭାରେ ସ୍ବୀକାର କରିଛନ୍ତି ଯେ ବ୍ରାହ୍ମଣୀ ନଦୀର ଉପର ମୁଣ୍ଡରେ ଝାଡ଼ଖଣ୍ଡ ସରକାର ୧୫ଟି ବନ୍ଧ ନିର୍ମାଣ କରିସାରିଛନ୍ତି। ଆଉ ୩ଟି ବନ୍ଧ ନିର୍ମାଣ କରିବେ। ଏହି ୧୮ଟି ପ୍ରକଳ୍ପ ମଧ୍ୟରୁ ଗୋଟିଏ ଜଳ ବିଦ୍ୟୁତ ପ୍ରକଳ୍ପ ଥିବା ବେଳେ ଆଉ ୧୭ଟି ଜଳସେଚନ ପାଇଁ ଉଦ୍ଦିଷ୍ଟ ବୋଲି କୁହାଯାଇଛି।

ରାଜ୍ୟ ସରକାରଙ୍କ ଜଳସଂପଦ ବିଭାଗ କହିଛି, ଝାଡ଼ଖଣ୍ଡ ସରକାର ବ୍ରାହ୍ମଣୀର ଉପନଦୀ ଶଙ୍ଖ ଓ କୋଏଲ୍ ନଦୀ ଉପରେ ଅପର୍ ସୁଙ୍କି ଜଳବିଦ୍ୟୁତ ପ୍ରକଳ୍ପ ଗୁମ୍ଲା ଜିଲ୍ଲାରେ କାର୍ଯ୍ୟକ୍ଷମ କରିଛନ୍ତି। ଏହାଛଡ଼ା ଅନ୍ୟ ୧୪ଟି ନଦୀବନ୍ଧ ଜଳସେଚନ ଉଦ୍ଦେଶ୍ୟରେ ଶଙ୍ଖ ଓ କୋଏଲ୍ ନଦୀ ଉପରେ ନିର୍ମାଣ କରାଯାଇଛି। ଆଉ ତିନିଟି ପ୍ରକଳ୍ପ ଉପରେ ସରକାର ପଦକ୍ଷେପ େନବାକୁ ଯାଉଛନ୍ତି।

ବିଧାୟକ ଦିଲିପ ରାୟ ବିଧାନସଭାରେ ପଚାରିଥିବା ଏକ ପ୍ରଶ୍ନର ଉତ୍ତରରେ ଜଳସମ୍ପଦ ମନ୍ତ୍ରୀ ନିରଞ୍ଜନ ପୂଜାରୀ ଏଭଳି ଚାଞ୍ଚଲ୍ୟକର ତଥ୍ୟ ରଖିଛନ୍ତି। ତାଙ୍କ ପ୍ରତିକ୍ରିୟାରେ ଶ୍ରୀ ରାୟ ଏକ ବିବୃତି ଦେଇ କହିଛନ୍ତି ଯେ କୋଏଲ୍ ଓ ଶଙ୍ଖ ନଦୀ ଉପରେ ଏକାଧିକ ବ୍ୟାରେଜ୍ ଯୋଗୁ ବ୍ରାହ୍ମଣୀର ଜଳ ପ୍ରବାହ ହ୍ରାସ ପାଇଛି। ସରକାର ଏ େନଇ ତୁରନ୍ତ ପଦକ୍ଷେପ ନ ନେଲେ ଆଗକୁ ଇସ୍ପାତ ନଗରୀ ରାଉରକେଲା ଉପରେ ପ୍ରଥମେ ଏହାର ସିଧାସଳଖ ପ୍ରତିକୂଳ ପ୍ରଭାବ ପଡ଼ିବ। କେବଳ ସେତିକି ନୁହେଁ ବ୍ରାହ୍ମଣୀ ଓଡ଼ିଶାର ଦ୍ୱିତୀୟ ବୃହତ୍ତମ ନଦୀ ହୋଇଥିବାରୁ ଏହା ଉପରେ ରାଜ୍ୟର ବ୍ୟାପକ ଅଞ୍ଚଳରେ କୃଷି, ଶିଳ୍ପ ଓ ଜୀବିକା ନିର୍ବାହ ପାଇଁ ଲୋକେ ନିର୍ଭର କରନ୍ତି। ଅନୁଗୁଳ, େଢଙ୍କାନାଳ, ଯାଜପୁର, େକନ୍ଦ୍ରାପଡା ଜିଲ୍ଲାରେ ମଧ୍ୟ ଏହାର ପ୍ରଭାବକୁ ଏଡାଇ େଦଇ େହବନାହିଁ। େକବଳ େସତିକି ନୁେହଁ, ଜଳ ପ୍ରବାହ କମିବା ସହିତ ବ୍ରାହ୍ମଣୀରେ ପ୍ରଦୂଷଣ ମାତ୍ରା ମଧ୍ୟ ଉଦବେଗଜନକ ଭାବେ ବଢ଼ି ଚାଲିଛି। ପୂଣ୍ୟତୋୟା ବ୍ରାହ୍ମଣୀର ସୁରକ୍ଷା ପାଇଁ ଗଙ୍ଗା ପୁନଃରୁଦ୍ଧାର ଢାଞ୍ଚାରେ ଉଭୟ କେନ୍ଦ୍ର ଓ ରାଜ୍ୟ ସରକାର ଅଗ୍ରାଧିକାର ଭିିତ୍ତିରେ କାର୍ଯ୍ୟ କରିବାକୁ ବିଧାୟକ ଶ୍ରୀ ରାୟ ମତ ରଖିଛନ୍ତି।

ଉଲ୍ଲେଖଯୋଗ୍ୟ, ସୁବର୍ଣ୍ଣରେଖା ନଦୀ ଉପରେ ଚାନ୍ଦିଲି ଡ୍ୟାମ୍ ଝାଡ଼ଖଣ୍ଡରେ କାର୍ଯ୍ୟକ୍ଷମ ରହିଛି। ଏଥିରୁ ଓଡ଼ିଶା, ପଶ୍ଚିମବଙ୍ଗ ଓ ଝାଡ଼ଖଣ୍ଡ ଲାଭବାନ ହେବେ େବାଲି କୁହାଯାଉଛି। େତବେ ବଂଶଧାରା ନଦୀରେ ଆନ୍ଧ୍ରପ୍ରଦେଶ ସରକାର ଗୋଟା ଓ କାଟ୍ରାଗୁଡ଼ାଠାରେ ୨ଟି ବନ୍ଧ ନିର୍ମାଣ କରିଥିବା ବେଳେ କାଟ୍ରାଗୁଡ଼ାଠାରେ ଅନ୍ୟ ଏକ ବ୍ୟାରେଜ୍ ନିର୍ମାଣର ପ୍ରସ୍ତାବ ରଖିଛନ୍ତି। ମହେନ୍ଦ୍ରତନୟାର ଉପନଦୀରେ ଚାପ୍ରାଠାରେ ଶ୍ରୀକାକୁଲମ୍ ଜିଲ୍ଲାରେ ଅନ୍ୟ ଏକ ପ୍ରକଳ୍ପ ନିର୍ମାଣ ଚାଲିଛି। ନାଗାବଳୀର ତଳମୁଣ୍ଡରେ ବିଜୟନଗରମର ଥୋଟାପାଲ୍ଲୀଠାରେ ଏବଂ ଏହାର ଉପନଦୀ ଝଞ୍ଜାବତୀ ଉପରେ ଆଉ ୨ଟି ବନ୍ଧ ନିର୍ମାଣ ହୋଇଛି। ନାଗାବଳୀର ଉପନଦୀ ଉପରେ ମଧ୍ୟ ଆଉ ୨ଟି ବ୍ୟାରେଜ୍ ଆନ୍ଧ୍ର ନିର୍ମାଣ କରିଛି। େତବେ ଓଡ଼ିଶାର ବିଭିନ୍ନ ନଦୀ ଉପରେ ୨୪ଟି ପ୍ରସ୍ତାବିତ ନଦୀବନ୍ଧ ପ୍ରକଳ୍ପ ପାଇଁ ସର୍ଭେ ଓ ଅନୁସନ୍ଧାନ ଜାରି ରହିଥିବା ଜଳ ସମ୍ପଦ ବିଭାଗ ସୂଚାଇଛି।