ଭିନ୍ନ ଭିନ୍ନ ସଡ଼କ ଦୁର୍ଘଟଣାରେ ୩ ମୃତ

ରାଉରକେଲା, ୧୨/୭  : ଗତକାଲି ବିଳମ୍ବିତ ରାତିରେ ରାଉରକେଲା ବନ୍ଧମୁଣ୍ଡା ଓ ତରକେରା ପମ୍ପ ହାଉସ୍ ନିକଟରେ ସଡ଼କ ଦୁର୍ଘଟଣା ହୋଇଛି । ଏହି ଦୁର୍ଘଟଣାରେ ୩ ଜଣଙ୍କ ମୃତ୍ୟୁ ହୋଇଥିବା ଖବର ମିଳିଛି । ତରକେରା ଟାଇଗର କଲୋନୀରେ ଶ୍ୟାମ ସୁନ୍ଦର ମହାନ୍ତ (୫୫) ପରିବାର ସହ ବାସ କରନ୍ତି । ସେ ଗତକାଲି ରାତି ପ୍ରାୟ ସାଢ଼େ ୮ଟା ବେଳେ ରାସ୍ତା ପାର ହେଉଥିବା ବେଳେ ତାଙ୍କୁ ପଛପଟୁ ଏକ ଡମ୍ଫର ଧକ୍କାଦେଇ ଫେରାର ହୋଇଯାଇଥିଲା । ତାଙ୍କୁ ସ୍ଥାନୀୟ ଲୋକେ ଚିକିତ୍ସା ପାଇଁ ଆରଜିଏଚ୍ରେ ଭର୍ତ୍ତି କରିଥିଲେ ।

ମାତ୍ର ସେଠାରେ ତାଙ୍କର ମୃତ୍ୟୁ ହୋଇଯାଇଥିଲା । ସେହିଭଳି ବନ୍ଧମୁଣ୍ଡା ଫଟାପାଇପ ନିକଟରେ ରାଉରକେଲାରୁ ମାର୍କେଟିଙ୍ଗ ସାରି ରୋହିତ ଝରା (୩୫) ଓ ବଙ୍କିମ ଝରା (୨୫) ନାମକ ଦୁଇ ବ୍ୟକ୍ତି ବାଇକ୍ ଯୋଗେ ନିଜ ଘର ବନ୍ଧମୁଣ୍ଡାକୁ ଫେରୁଥିଲେ । ରାତି ସାଢ଼େ ୯ଟା ବେଳେ ସେମାନଙ୍କୁ ସମ୍ମୁଖରୁ ଏକ ଟ୍ରକ ଧକ୍କା ଦେଇଥିଲା । ଫଳରେ ଦୁଇଜଣ ରାସ୍ତା ଉପରେ ଛିଟ୍କି ପଡ଼ିଥିଲେ । ଏହି ଦୁର୍ଘଟଣାରେ ରୋହିତଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା  ବେଳେ ବଙ୍କିମଙ୍କ ଛାତି ଓ କାନପଟିରେ ଗୁରୁତର ଆଘାତ ଲାଗିଥିଲା ।

ଘଟଣା ସ୍ଥଳରେ ପୁଲିସ ସହାୟତା ଗାଡ଼ି ପହଞ୍ଚି ଉଭୟଙ୍କୁ ଉଦ୍ଧାର କରି ଆରଜିଏଚ୍ରେ ଚିକିତ୍ସାଲାଗି ଭର୍ତ୍ତି କରିଥିଲା । ମାତ୍ର ସେଠାରେ ଉଭୟଙ୍କୁ ଡାକ୍ତର ମୃତ୍ୟୁ ଘୋଷଣା କରିଥିଲେ । ପୁଲିସ ଉଭୟ ଘଟଣାର ତଦନ୍ତ କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ।