ଭାରତରତ୍ନ ଅଟଳ ବିହାରୀ ବାଜପେୟୀଙ୍କୁ ଶ୍ରଦ୍ଧାଞ୍ଜଳି

ରାଉରକେଲା, ୩୦ା୮: ମହାନ ରାଷ୍ଟ୍ରନାୟକ, ଭାରତରତ୍ନ, ବିଶିଷ୍ଟ କବି ତଥା ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତ ଅଟଳ ବିହାରୀ ବାଜପେୟୀଙ୍କ ବିୟୋଗ ସମଗ୍ର ଦେଶବାସୀଙ୍କୁ ବ୍ୟଥିତ ତଥା ମର୍ମାହତ କରିଥିବା ବେଳେ ସ୍ଥାନୀୟ ସେକ୍ଟର-୪ ମାର୍କେଟ କମିଟି ପକ୍ଷରୁ ସ୍ୱର୍ଗତ ବାଜପେୟୀଙ୍କୁ ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ସେହି ଯୋଗଜନ୍ମାଙ୍କ ଉଦ୍ଦେଶ୍ୟରେ ଏକ ଶ୍ରଦ୍ଧାଞ୍ଜଳି ସଭାର ଆୟୋଜନ କରାଯାଇଥିଲା ।

ମାର୍କେଟ କମିଟିର ବରିଷ୍ଠ ସଦସ୍ୟ ପ୍ରମୋଦ ପଣ୍ଡା ଓ ମହେନ୍ଦ୍ରନାଥ ଦାସଙ୍କ ଆବାହକତ୍ୱରେ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ରଘୁନାଥପାଲି ନିର୍ବାଚନ ମଣ୍ଡଳୀ ବିଜେଡି ନଗର ସଭାପତି ସୁଧୀର ସୁନ୍ଦରରାୟ ଯୋଗ ଦେଇଥିଲେ । ଶ୍ରୀ ସୁନ୍ଦରରାୟଙ୍କ ସମେତ ଏଠାରେ ଉପସ୍ଥିତ ମାର୍କେଟର ବ୍ୟବସାୟୀ ତଥା ସ୍ଥାନୀୟ ଅଞ୍ଚଳର ସଦସ୍ୟଗଣ ସ୍ୱର୍ଗତ ବାଜପେୟୀଙ୍କ ଫଟୋଚିତ୍ରରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଏହି ଅବସରରେ ଶ୍ରୀ ସୁନ୍ଦରରାୟ ନିଜ ବକ୍ତବ୍ୟରେ ସ୍ୱର୍ଗତ ବାଜପେୟୀଙ୍କ ସ୍ମୃତିଚରାଣ କରିବା ସହ ତାଙ୍କ ଭଳି ବ୍ୟକ୍ତିତ୍ୱ ଅନନ୍ୟ ବୋଲି ପ୍ରକାଶ କରିଥିଲେ ।

ଦେଶବାସୀଙ୍କ ନିକଟରେ ସ୍ୱର୍ଗତ ବାଜପେୟୀ ଚିରସ୍ମରଣୀୟ ହୋଇରହିବେ ବୋଲି କହିଥିଲେ । ସଭାରେ ଅନ୍ୟମାନଙ୍କ ମଧ୍ୟରେ ବିଜେଡିର ବରିଷ୍ଠ ସଦସ୍ୟ ବଂଶୀଧର ପରିଡା, ପ୍ରହ୍ଲାଦ ନାୟକ, ରମେଶ ପାତ୍ର, ଅଶୋକ ଜେନା, ପ୍ରମୋଦ ସେଠୀ, ବିରେନ୍ଦ୍ର ନାରାୟଣ ସିଂ, ସୀତାକାନ୍ତ ରଥଙ୍କ ସମେତ ଅନ୍ୟମାନେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।