ବାଲାକୋଟ୍‌ ଏୟାରଷ୍ଟ୍ରାଇକ୍‌ ପରେ ପାକିସ୍ତାନର ଆକାଶୀ ଆକ୍ରମଣକୁ ରୋକିଥିଲେ ଏହି ମହିଳା, ଏବେ ଯୁଦ୍ଧ ସେବା ପଦକରେ କରାଯିବ ସମ୍ମାନିତ

ନୂଆଦିଲ୍ଲୀ : ପୁଲଓ୍ଵାମାରେ ଭାରତୀୟ ଯବାନମାନଙ୍କ ଉପରେ ଆକ୍ରମଣ କରାଯିବା ପରେ ଏହାର ଜବାବ ଦେବା ପାଇଁ ପାକିସ୍ତାନର ବାଲାକୋଟ ଉପରେ ଏୟାରଷ୍ଟ୍ରାଇକ୍‌ କରାଯାଇଥିଲା । ବାଲାକୋଟ୍‌ରେ ଥିବା ଜୈସ୍‌-ଇ-ମହମ୍ମଦର ଆତଙ୍କୀ କ୍ୟାମ୍ପ ଉପରେ ଏୟାରଷ୍ଟ୍ରାଇକ୍‌ କରାଯାଇଥିବା ବେଳେ ପ୍ରାୟ ୩୦୦ ଆତଙ୍କବାଦୀ ମୃତ୍ୟୁବରଣ କରିଥିବା ନେଇ ସୂଚନା ମିଳିଥିଲା । ତେବେ ଏୟାରଷ୍ଟ୍ରାଇକ୍‌ ପରେ ପରେ ପାକିସ୍ତାନ ଆକାଶମାର୍ଗରେ ଭାରତକୁ ଆକ୍ରମଣ କରିବାର ଯୋଜନା କରିଥିଲା, ଯାହାକୁ ବିଫଳ କରିବାରେ ମୁଖ୍ୟ ଭୂମିକା ନିଭାଇଥିଲେ ସ୍କ୍ଵାଡର୍ନ ଲିଡର ମିଣ୍ଟି ଅଗ୍ରଓ୍ଵାଲ । ଏବେ ତାଙ୍କୁ ଭାରତୀୟ ବାୟୁସେନା ପକ୍ଷରୁ ଯୁଦ୍ଧ ସେବା ପଦକରେ ସମ୍ମାନିତ କରାଯିବ ବୋଲି ଜଣାପଡ଼ିଛି । ଯୁଦ୍ଧ ବା କୌଣସି ସଂଘର୍ଷ ସମୟରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିବା ବ୍ୟକ୍ତିକୁ ଏହି ସମ୍ମାନରେ ଭୂଷିତ କରାଯାଇଥାଏ ।