ରାଉରକେଲା, ୨୨ା୮ : ବହୁୁ ଅପରାଧ ସହ ଜଡ଼ିତ ଶ୍ରୀଧର ନାୟକ ଓରଫ୍ ସିରିଆକୁ ସେକ୍ଟର-୩ ପୁଲିସ ଗିରଫ କରିଛି । ସିରିଆ ନାଁରେ ହତ୍ୟା ଉଦ୍ୟମ, ବେଆଇନ ଅସ୍ତ୍ରଶସ୍ତ୍ର ରଖିବା ଓ ମାଡ଼ପିଟ୍ ସମେତ ଅନ୍ୟାନ୍ୟ ୫ଟି ମାମଲା ରହିଛି । ତାକୁ କୋର୍ଟ ଚାଲାଣ କରାଯାଇଛି । କୋର୍ଟରେ ଜାମିନ ନାମଞ୍ଜୁର ହୋଇଯାଇଛି । ସେକ୍ଟର-୨ ଖରିଆବାହାଲ ବସ୍ତିରେ ସିରିଆ ରହୁଛି ।
ତା’ ବିରୋଧରେ ସେକ୍ଟର-୩ ଥାନାରେ ୪ଟି ମାମଲା ରହିଛି । ମାଡ଼ପିଟ, ଗଣ୍ଡଗୋଳ ଓ ବନ୍ଧୁକ ଦେଖାଇ ଲୋକଙ୍କୁ ଧମକଚମକ ଦେବା ନେଇ ଥାନାରେ ଅଭିଯୋଗ ରହିଛି । ଝିରିପାଣି ଥାନାରେ ମଧ୍ୟ ଏକ ହତ୍ୟା ଉଦ୍ୟମ ଅଭିଯୋଗ ନେଇ ମାମଲା ରୁଜୁ ହୋଇଛି । ମାମଲା ରୁଜୁ ହେଲା ପରେ ସେ କିଛି ଦିନ ବାହାରକୁ ଚାଲି ଯାଉଥିଲା । ପୁଣି ଫେରି ଆସି ନୂଆ ଝାମେଲା ସୃଷ୍ଟି କରୁଥିଲା । ଗତ ଏପ୍ରିଲ ମାସରେ ସେହି ଖରିଆ ବାହାଲ ବସ୍ତିରେ ଜଣେ ବ୍ୟକ୍ତିଙ୍କୁ ପିସ୍ତଲ ଦେଖାଇ ଜୀବନରେ ମାରି ଦେବାକୁ ଧମକ ଦେଇଥିଲା ।
ପୁଲିସରେ ମାମଲା ରୁଜୁ ପରେ ଗିରଫ ଭୟରେ ଫେରାର ହୋଇ ଯାଇଥିଲା । ଗତକାଲି ସିରିଆ ଘରକୁ ଆସିଥିବା ଖବର ପାଇ ପୁଲିସ ଚଢ଼ଉ କରି ତାକୁ ଗିରଫ କରିଥିଲା । ତା’ର ଅନ୍ୟତମ ସହଯୋଗୀ ଜିତୁ ବନ୍ଧୁକ ନେଇ ଫେରାର ହୋଇଯାଇଛି । ତେଣୁ ପୁଲିସ ତା’ଠାରୁ ବନ୍ଧୁକ ଜବତ କରି ପାରିନାହିଁ । ସିରିଆକୁ କୋର୍ଟ ଚାଲାଣ କରାଯାଇଛି । କୋର୍ଟରେ ତା’ର ଜାମିନ ନାକଚ ହୋଇଯାଇଛି ।
Prasanta Patnaik