ଯାଜପୁର , ଜାନୁୟାରୀ ୦୭ : ବରୀ ନିର୍ବାଚନମଣ୍ଡଳୀର ରାଜନୈତିକ ପାଣିପାଗ ଏବେ ଉଷ୍ମ ହେବାରେ ଲାଗିଛି। ଆସନ୍ତା ୧୨ ତାରିଖରେ ପିସିସି ସଭାପତି ନିରଞ୍ଜନ ପଟ୍ଟନାୟକ ବରୀ ଗସ୍ତରେ ଆସୁଛନ୍ତି। ଏହାକୁ ନେଇ କଂଗ୍ରେସ ଶିବିର ବେଶ୍ ଉତ୍ସାହିତ। କଂଗ୍ରେସ ଯୁବନେତା ଉମେଶ ଜେନାଙ୍କ ନେତୃତ୍ବରେ ଏଠାରେ କଂଗ୍ରେସ ସଂଗଠନ ଅପେକ୍ଷାକୃତ ସୁଦୃଢ଼ ହେବାରେ ଲାଗିଛି। ତେଣୁ ଏହାକୁ ନେଇ ଉଭୟ ବିଜେଡି ଏବଂ ବିଜେପି ଶିବିର ଚିନ୍ତାରେ ପଡିଛନ୍ତି। କଂଗ୍ରେସର ଉତ୍ଥାନ ହେଲେ କିଏ ଅଧିକ କ୍ଷତିଗ୍ରସ୍ତ ହେବ ସେ ନେଇ ଚର୍ଚ୍ଚା ଜୋର ଧରିଛି।
ବରୀ ନିର୍ବାଚନମଣ୍ଡଳୀରୁ ଲଗାତର ଚାରି ଚାରି ଥର ବିଧାୟକ ହୋଇଥିବା ଦେବାଶିଷ ନାୟକଙ୍କୁ କଡ଼ା ଟକ୍କର ଦେଉଛନ୍ତି ବିଜେପି ଯୁବ ନେତା ବିଶ୍ବରଂଜନ ମଲ୍ଲିକ।ଏହି ଦୁଇ ନେତାଙ୍କ ଗୋଟି ଚାଳନା ଆସନ୍ତା ନିର୍ବାଚନକୁ ସରଗରମ କରିବ ବୋଲି ଆକଳନ କରାଯାଉଥିଲା। ତେବେ ଏଠାରେ କଂଗ୍ରେସ ଶକ୍ତିବୃଦ୍ଧି କରି ଚାଲିଥିବାରୁ ଆଗକୁ ଏହି ନିର୍ବାଚନ ମଣ୍ଡଳୀରେ ତ୍ରିକୋଣୀୟ ଲଢ଼େଇ ହେବ। ସେ ନେଇ ରାଜନୈତିକ ମହଲ ପୂର୍ବାନୁମାନ କରିଛନ୍ତି।
ଅଧିକ ଆଶାୟୀ ପ୍ରାର୍ଥୀଙ୍କ ଯୋଗୁଁ ବିଜେଡି ପାଇଁ ଅଡୁଆ ପରିସ୍ଥିତି ସୃଷ୍ଟି ହୋଇଛି। ବିଜେଡି ରାଜ୍ୟ ସଂପାଦକ ବିଜୟ ନାୟକ, ମହିଳା ମୁଖପାତ୍ର ସୁଲତା ଦେଓ, ସୁଲୋଚନା ଦାସ ଏଠାରୁ ପ୍ରାର୍ଥୀ ହେବାକୁ ଚାହିଁ ବସିଛନ୍ତି। ସେହିପରି ବିଜେପିର ପୂର୍ବତନ ଜିଲ୍ଲା ସଭାପତି ତଥା ରାଷ୍ଟ୍ରୀୟ କର୍ମକର୍ତ୍ତା ଆଶୁତୋଷ ପରିଡ଼ା ନଜର ମଧ୍ୟ ବିଜେପି ଟିକେଟ୍ ଉପରେ ରହିଛି।
Prasanta Patnaik