ପଶ୍ଚିମବଙ୍ଗ, ସେପ୍ଟେମ୍ବର ୧୮ : ଦିବଙ୍ଗତ ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁକୁ ତିନି ମାସ ହୋଇଥିଲେ ସୁଦ୍ଧା ଆଜି ବି ତାଙ୍କ ନିଖୁଣ ଅଭିନୟ ପ୍ରଶଂସକଙ୍କ ହୃଦୟରେ ସ୍ବତନ୍ତ୍ର ସ୍ଥାନ ପାଇଛି । ପଶ୍ଚିମବଙ୍ଗର ଜଣେ ମୂର୍ତ୍ତିକାର ସୁଶାନ୍ତଙ୍କୁ ଜୀବନ୍ତ କରିବାକୁ ଯାଇ ନିର୍ମାଣ କରିଛନ୍ତି ମହମର ଅବିକଳ ପ୍ରତିମୂର୍ତ୍ତି ।
ପ୍ରତିମୂର୍ତ୍ତିଟି ଏତେ ଜୀବନ୍ତ ହୋଇଛି ଦେଖିଲେ ଲାଗୁଛି ଯେପରି ସୁଶାନ୍ତ ଠିଆ ହୋଇଛନ୍ତି । କଥା କହିବାକୁ ଚାହୁଁଛନ୍ତି । ଏହି ମହମ ପ୍ରତିମୂର୍ତି ତିଆରି କରିଛନ୍ତି ମୂର୍ତ୍ତିକାର ସୁକାନ୍ତୋ ରାୟ ।
ପଶ୍ଚିମବଙ୍ଗର ଆସାନସୋଲରେ ରହୁଥିବା ସୁକାନ୍ତୋ ମହମ ପ୍ରତିମୂର୍ତ୍ତି କରନ୍ତି ସେ ଲଣ୍ଡନର ମ୍ୟାଡ଼ାମ ତୁସାଦ ମହମ ସଂଗ୍ରହାଳୟ ଭଳି ଏକ ସଂଗ୍ରହାଳୟ ନିଜେ କରିଛନ୍ତି ।
ସେହି ସଂଗ୍ରହାଳୟରେ ଅମିତାଭ ବଚ୍ଚନ, ରବୀନ୍ଦ୍ର ନାଥ ଟାଗୋର, ବିରାଟ କୋହଲି, ମମତା ବାନାର୍ଜୀ ଭଳି ପ୍ରମୁଖ ବ୍ୟକ୍ତିତ୍ବଙ୍କ ମହମ ପ୍ରତିମୂର୍ତି ନିଜେ ତିଆରି କରିଛନ୍ତି । ଯଦି ସୁଶାନ୍ତଙ୍କ ପରିବାର ଲୋକେ ଚାହିଁବେ ତେବେ ସେ ସେମାନଙ୍କ ପାଇଁ ମଧ୍ୟ ଏହିଭଳି ଏକ ମହମ ପ୍ରତିମୂର୍ତ୍ତି ତିଆରି କରିଦେବେ ବୋଲି କହିଛନ୍ତି ।