ଭୁବନେଶ୍ୱର, ଡିସେମ୍ବର ୨୯ : ରାଜ୍ୟରେ ବଢ଼ୁଛି ସଡ଼କ ଦୁର୍ଘଟଣା। ୨୦୧୭ରେ ଦେଶରେ ଦୁର୍ଘଟଣାରେ ୧.୪୮ଲକ୍ଷ ଲୋକ ପ୍ରାଣ ହରାଇଥିବା ବେଳେ ଓଡ଼ିଶାରେ ଏହି ସଂଖ୍ୟା ୪ ହଜାର ୮୦୦ ରହିଥିଲା। ୫ ହଜାର ଲୋକ ଗୁରୁତର ଆହତ ହୋଇଥିଲେ। ଗତ ଦଶନ୍ଧି ମଧ୍ୟରେ ବିଭିନ୍ନ ଦୁର୍ଘଟଣାରେ ରାଜ୍ୟରେ ୩୦ ହଜାର ଲୋକଙ୍କ ପ୍ରାଣହାନି ଘଟିଛି। ଦେଶରେ ପ୍ରତି ୧୦୦ଟି ଦୁର୍ଘଟଣାରେ ୨୯ଜଣଙ୍କର ମୃତ୍ୟୁ ହୋଇଥିବା ବେଳେ ଓଡ଼ିଶାରେ ୪୪ ଜଣ ମରୁଛନ୍ତି। ଦେଶ ତୁଳନାରେ ରାଜ୍ୟରେ ଦୁର୍ଘଟଣା ହାର ବଢ଼ିଥିବାରୁ ଏବେ ଚିନ୍ତା ପ୍ରକଟ କରାଯାଇଛି। ବାଣିଜ୍ୟ ଓ ପରିବହନ ମନ୍ତ୍ରୀ ନୃସିଂହ ଚରଣ ସାହୁ ଏନେଇ ସମୀକ୍ଷା କରିବା ସହ ଅସନ୍ତୋଷ ପ୍ରକାଶ କରିଛନ୍ତି।
୨୦୧୪ରେ ଗଠିତ ରାଧାକ୍ରିଷ୍ଣନ୍ କମିଟି ନିୟମିତ ଭାବେ ଦୁର୍ଘଟଣା ହାର ହ୍ରାସ କରିବା ଦିଗରେ ବିଭିନ୍ନ ସୂତ୍ରରୁ ସମୀକ୍ଷା କରିବା ସହ ଏହାର ନିରାକରଣ ପାଇଁ ପଦକ୍ଷେପ ଗ୍ରହଣ କରିଛନ୍ତି। ୨୦୨୦ ସୁଦ୍ଧା ଦୁର୍ଘଟଣା ହାର ୫୦ପ୍ରତିଶତ ହ୍ରାସ କରିବା ପାଇଁ କମିଟି ଗୁରୁତ୍ୱାରୋପ କରିଥିବା ବେଳେ ରାଜ୍ୟରେ ଏହାର ବିପରୀତ ଚିତ୍ର ଦେଖିବାକୁ ମିଳିଛି। ୨୦୧୫ ତୁଳନାରେ ୨୦୧୬ ଓ ୨୦୧୭ ମସିହାରେ ଦୁର୍ଘଟଣା ହାର ୭.୩୩% ବୃଦ୍ଧି ହୋଇଛି। ୨୦୧୮ ଅକ୍ଟୋବର ସୁଦ୍ଧା ରାଜ୍ୟରେ ୪୨୭୦ଟି ଦୁର୍ଘଟଣା ଘଟିଛି। ୨୦୧୭ ତୁଳନାରେ ୮.୪୩% ପ୍ରତିଶତ ବଢ଼ିଛି। ଦୁର୍ଘଟଣା ହାର ପ୍ରତିବର୍ଷ ୧୦% ହ୍ରାସ କରିବାକୁ ସୁପ୍ରିମ୍କୋର୍ଟଙ୍କ କଡ଼ା ନିର୍ଦ୍ଦେଶ ଦେବା ପରେ ବି କୌଣସି ସୁଧାର ଆସି ନଥିବା ସମୀକ୍ଷା ବୈଠକରୁ ଜଣାପଡ଼ିଛି।
ଦୁର୍ଘଟଣା ପ୍ରବଣ ସ୍ଥାନରେ ସୂଚିତ କରିବା ସହ ସିଟିଜେନ୍ ରିପୋର୍ଟିଂ ବ୍ୟବସ୍ଥା ଲାଗୁ କରିବାକୁ ପ୍ରସ୍ତାବ ଦିଆଯାଇଛି। ଫଳରେ ଯାନବାହନ ଚଳାଚଳରେ ବ୍ୟତିକ୍ରମ ଦେଖିଲେ ଲୋକେ ତୁରନ୍ତ ପୁଲିସ କର୍ତ୍ତୃପକ୍ଷଙ୍କୁ ଏକ ନିର୍ଦ୍ଦିଷ୍ଟ ସାର୍ବଜନୀନ ଫୋନ୍ ନମ୍ବରରେ ସୂଚନା ଦେଇପାରିବେ। ସମସ୍ତ ଜିଲ୍ଲା ଓ ସବ୍ଡିଭିଜନ୍ରେ ଇଲେକ୍ଟ୍ରୋନିକ୍ ଟ୍ରାଫିକ୍ ସିଗ୍ନାଲ୍ ବ୍ୟବସ୍ଥା ଲାଗୁ ସହ ପୁରୀ, ଅନୁଗୁଳ, ଖୋର୍ଦ୍ଧା, କେନ୍ଦୁଝର, କୋରାପୁଟ, ବାଲେଶ୍ୱର, ବ୍ରହ୍ମପୁର, ସମ୍ବଲପୁର, ରାଉରକେଲା ଓ କମିସନରେଟ୍ ପୁଲିସରେ ଷ୍ଟୁଡେଣ୍ଟ ଟ୍ରାଫିକ୍ ଭଲ୍ୟୁଣ୍ଟାରି ସ୍କଲାରସିପ୍ ବ୍ୟବସ୍ଥା ଆରମ୍ଭ ଉପରେ ଗୁରୁତ୍ୱାରୋପ କରାଯାଇଥିଲା।