209 Views
ମୁମ୍ବାଇ: ବିନା କାରଣରେ ବିମାନ ଯାତ୍ରା ବାତିଲ କରିଥିବାରୁ ଗୋଏୟାର୍ ବିମାନ କମ୍ପାନିକୁ ଖାଉଟି ଅଦାଲତ ଗତ ସପ୍ତାହରେ ମୁମ୍ବାଇର ଜଣେ ଅଭିଯୋଗକାରୀଙ୍କୁ ଅନୁକମ୍ପାମୂଳକ ରାଶି ଭାବେ ୯୮ ହଜାରରୁ ଊର୍ଧ୍ୱ ଟଙ୍କା ପ୍ରଦାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ମୁମ୍ବାଇର ଭିଲେ ପାର୍ଲେରେ ରହୁଥିବା ଜୟସ୍ ପାଣ୍ଡ୍ୟା ନାମକ ବ୍ୟକ୍ତି ୨୦୧୪ ମସିହା ମେ ମାସରେ ଅହମ୍ମଦାବାଦ୍ରୁ ମୁମ୍ବାଇକୁ ଆସିବା ପାଇଁ ୫୦,୦୦୦ ଟଙ୍କା ଖର୍ଚ୍ଚ କରି ୨୫ଟି ବିମାନ ଟିକେଟ୍ କରିଥିଲେ।
ଝିଅ ବାହାଘରରେ ଅତିଥିମାନଙ୍କୁ ଯୋଗଦାନ ସକାଶେ ପାଣ୍ଡ୍ୟା ଏକାଥରରେ ଏତେଗୁଡ଼ାଏ ବିମାନ ଟିକେଟ କିଣିଥିଲେ। ୨୦୧୫ ମସିହା ଫେବ୍ରୁଆରି ୧୭ ତାରିଖରେ ଅତିଥିମାନେ ମୁମ୍ବାଇରେ ତାଙ୍କ ବିବାହ ଉତ୍ସବ ସ୍ଥାନରେ ପହଞ୍ଚିବେ ବୋଲି ଯୋଜନା ହୋଇଥିଲା। ଏପରିକି ଅତିଥିମାନଙ୍କ ପହଞ୍ଚିବାକୁ ଦୃଷ୍ଟିରେ ରଖି ସେ ପୂଜା ଆୟୋଜନ ବି କରିଥିଲେ। ମାତ୍ର ଶେଷ ମୂହୂର୍ତ୍ତରେ ସେ ବିମାନ କର୍ତ୍ତୃପକ୍ଷଙ୍କୁ ଯୋଗାଯୋଗ କରିବାରୁ ଯାତ୍ରା ବାତିଲ କରି ଦିଆଯାଇଛି ବୋଲି ଶୁଣିବାକୁ ମିଳିଥିଲା। ତେବେ, ଏହା ପଛର କୌଣସି କାରଣ ଥିବା ନେଇ ବିମାନ କର୍ତ୍ତୃପକ୍ଷ କୌଣସି ସୂଚନା ଦେଇନଥିଲେ। ବାଧ୍ୟ ହୋଇ ପାଣ୍ଡ୍ୟା ଅନ୍ୟ ଏକ ଏୟାର୍ଲାଇନ୍ରେ ୮୮,୮୧୬ ଟଙ୍କା ଖର୍ଚ୍ଚ କରି ଅତିଥିମାନଙ୍କ ପାଇଁ ଟିକେଟ୍ କରିଥିଲେ।
ପାଣ୍ଡ୍ୟା ୨୦୧୫ ମସିହା ଫେବ୍ରୁଆରି ମାସରେ ଗୋଏୟାର୍ରେ ଏ ସଂପର୍କରେ ଅଭିଯୋଗ ଆଣିବା ପରେ କମ୍ପାନି ପକ୍ଷରୁ ତାଙ୍କୁ ମାତ୍ର ୩ ହଜାର ଟଙ୍କାର କ୍ରେଡିଟ୍ ଭାଉଚର୍ ଦିଆଯିବା ସହ ଖୁବ୍ ଶୀଘ୍ର ତାଙ୍କ ଟଙ୍କା ଫେରସ୍ତ ହେବ ବୋଲି ସୂଚନା ମିଳିଥିଲା। ମାତ୍ର ବିଳମ୍ବ ହେବାରୁ ପାଣ୍ଡ୍ୟା .ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟକୁ ୨୦୧୫ ଫେବ୍ରୁଆରି ୧୭ ତାରିଖରେ ଆର୍ଟିଆଇ ଜରିଆରେ ପ୍ରଶ୍ନ କରିଥିଲେ। ପରେ ୨୦୧୬ ମସିହା ନଭେମ୍ବର ମାସରେ ଖାଉଟି ଅଦାଲତରେ କ୍ଷତିପୂରଣ ଲାଗି ପିଟିସନ୍ କରିଥିଲେ।
ଖାଉଟି ଅଦାଲତରେ ଗୋଏୟାର୍ ପକ୍ଷରୁ ସଫେଇ ଦିଆଯାଇ କୁହାଯାଇଛି କି ୨୦୧୪ ମସିହା ସେପ୍ଟେମ୍ବର ୬ ତାରିଖରେ ବିମାନର ସମୟ ପରିବର୍ତ୍ତନ କରାଯାଇଥିଲା। ଯାତ୍ରା ବାତିଲ କରାଯିବା ସଂପର୍କରେ ପାଣ୍ଡ୍ୟାଙ୍କୁ ଇ-ମେଲ୍ ଜରିଆରେ ଜଣାଯାଇଥିଲା। ଏପରି କହିବା ସହ ଗୋଏୟାର୍ ପକ୍ଷରୁ ୨୦୧୫ ମସିହାରେ ପାଣ୍ଡ୍ୟାଙ୍କୁ ପ୍ରେରଣ କରାଯାଇଥିବା ମେଲ୍ର ଏକ କଫି ମଧ୍ୟ ଜମା କରାଯାଇଛି। ଯାହା ବି ହେଉ, ସମସ୍ତ କଥାକୁ ବିଚାର କରାଯାଇ ଅଦାଲତ ପକ୍ଷରୁ ପାଣ୍ଡ୍ୟାଙ୍କୁ ଟିକେଟ୍ ଦର ହିସାବରେ ୫୦ ହଜାର, ଅନ୍ୟ ଏକ ଏୟାରଲାଇନ୍ରେ ପାଣ୍ଡ୍ୟା ଦେଇଥିବା ଅତିରିକ୍ତ ରାଶି ବାବଦରେ ୩୮,୮୧୬ ଟଙ୍କା ଓ ଅନୁକମ୍ପା ରାଶି ବାବଦରେ ୧୦ ହଜାର ମିଶାଇ ସମୁଦାୟ ୯୮ ହଜାରରୁ ଊର୍ଧ୍ୱ ଟଙ୍କା ଦେବା ପାଇଁ କୁହାଯାଇଛି।
Prasanta Patnaik