ଶ୍ରୀନଗର, ଅକ୍ଟୋବର ୩୧ : ଜମ୍ମୁ କଶ୍ମୀରରେ ଆତଙ୍କବାଦୀ ବିରୋଧରେ ସେନାକୁ ମଙ୍ଗଳବାର ଏକ ବଡ଼ ସଫଳତା ମିଳିଛି । ଏହି କାର୍ଯ୍ୟାନୁଷ୍ଠାନ ବଳରେ ସେନାର ଯବାନମାନେ ୨ ଜଣ ଆତଙ୍କବାଦୀଙ୍କୁ ନିହତ କରିଛନ୍ତି । ନିହତଙ୍କ ମଧ୍ୟରେ ସାମିଲ ଅଛି କୁଖ୍ୟାତ ଆତଙ୍କବାଦୀ ମୌଲାନା ମସୁଦ ଆଜହରଙ୍କ ପୁତୁରା । ସେନା ସୂତ୍ରରୁ ଜାତୀୟ ଗଣମାଧ୍ୟମକୁ ମିଳିଥିବା ସୂଚନା ଅନୁସାରେ ତ୍ରାଲର ମଣ୍ଡୁରା ଅଞ୍ଚଳରେ ଏନକାଉଣ୍ଟର ହୋଇଥିଲା । ଦକ୍ଷିଣ କଶ୍ମୀରରେ ହୋଇଥିବା ଏନକାଉଣ୍ଟର ପୂର୍ବରୁ ସେନା ପକ୍ଷରୁ ତଲାସି ଅଭିଯାନ ଆରମ୍ଭ କରାଯାଇଥିଲା ।
ନିହତ ହୋଇଥିବା ଆତଙ୍କବାଦୀଙ୍କ ପରିଚୟ ମିଳିଛି । ସେମାନେ ହେଲେ ସଉକତ ଅହମଦ ଖାନ । ଅହମଦ ଖାନ ହେଉଛି ତ୍ରାଲ ଅନ୍ତର୍ଗତ ହଣ୍ଡୋରା ନିବାସୀ । ସେହିଭଳି ପାକିସ୍ତାନରୁ ଉସମାନ ନାମକ ଆତଙ୍କବାଦୀ ଏନକାଉଣ୍ଟରରେ ନିହତ ହୋଇଛି ।
ରିପୋର୍ଟ ଅନୁସାରେ ସେନାର କାର୍ଯ୍ୟାନୁଷ୍ଠାନରେ ଜୈଶ-ଏ-ମହମ୍ମଦର କୁଖ୍ୟାତ ଆତଙ୍କବାଦୀ ମୌଲାନା ମସୁଦ ଆଜହରର ପୁତୁରା ମଧ୍ୟ ନିହତ ହୋଇଛି । ଏହି ଅପରେସନରେ ୪୨ ରାଷ୍ଟ୍ରୀୟ ରାଇଫଲସ, ଏସଓଜି ଓ ସିଆରପିଏଫର ଯବାନମାନେ ସାମିଲ ଥିଲେ । ସେନା ଯେତେବେଳେ ଆତଙ୍କବାଦୀଙ୍କ ଉପରକୁ ଗୁଳି କରିବା ଆରମ୍ଭ କରି ଦେଇଥିଲା, ବିପରୀତ ପକ୍ଷରୁ ମଧ୍ୟୁ ଗୁଳି ଚାଳନା ଆରମ୍ଭ ହୋଇ ଯାଇଥିଲା ।
କିଛି ସମୟ ପର୍ଯ୍ୟନ୍ତ ଏନକାଉଣ୍ଟର ଜାରି ରହିବା ପରେ ଅପରେସନରେ ଶେଷରେ ସେନା ଏକ ଘରକୁ ଉଡାଇ ଦେଇଥିଲା, ଯେଉଁଠାରୁ ଆତଙ୍କବାଦୀମାନେ ସେନା ଉପରକୁ ଗୁଳି ଚଳାଇଥିଲେ । ଏଠାରୁ ସେନାକୁ ୨ ମୃତଦେହ ଏବଂ ଏମ-୪ ସ୍ନାଇପର ରାଇଫଲ ହସ୍ତଗତ ହୋଇଛି । କାର୍ଯ୍ୟାନୁଷ୍ଠା ସମୟରେ ଆତଙ୍କବାଦୀ ସଂଗଠନର ଜଣେ ସ୍ନାଇପର ନିହତ କରିବା ସେନା ପାଇଁ ଏକ ଅନ୍ୟତମ ସଫଳତା । ସୂଚନାଯୋଗ୍ୟ ଯେ, ବିଗତ ଦିନରେ ଜୈଶ-ଏ-ମହମ୍ମଦର ସ୍ନାଇପରମାନେ ଲୁଚି ଛପି ୩ ଯବାନଙ୍କୁ ଗୁଳି କରିଥିଲେ । ଫଳରେ ୩ ଜଣ ଯବାନ ସହିଦ ହୋଇଥିଲେ ।
Prasanta Patnaik