ଭୁବନେଶ୍ୱର : ଓଡ଼ିଶା ଚାଷୀଙ୍କ ନିକଟରେ କଳା କୁକୁଡ଼ା ‘କଡ଼କନାଥ’। ମଧ୍ୟ ଭାରତରେ ଚାଷ ହେଉଥିବା ଏହି ଦେଶୀ ପ୍ରଜାତିର କୁକୁଡ଼ାକୁ ଓଡ଼ିଶା ଜଳବାୟୁରେ ଚାଷ କରିବା ଦିଗରେ ପଦକ୍ଷେପ ନିଆଯାଇଛି। ପ୍ରାରମ୍ଭିକ ଗବେଷଣା ପରେ ଜଣାପଡ଼ିଛି ଯେ ଏହି ପ୍ରଜାତିର କୁକୁଡ଼ା ଓଡ଼ିଶାର ଜଳବାୟୁ ସହ ଭଲ ଭାବେ ତିଷ୍ଠି ରହି ପାରୁଛନ୍ତି। ବାର୍ଷିକ ହାରାହାରି ୧୩୦ଟି ପର୍ଯ୍ୟନ୍ତ ଅଣ୍ଡା ଦେଉଥିବା ବେଳେ ମାଂସ ଉତ୍ପାଦନ ବି ଅଧିକ ରହୁଛି। ସ୍ୱାସ୍ଥ୍ୟ ପାଇଁ ଏହା ବେଶ୍ ଉପଯୋଗୀ ବୋଲି ବୈଜ୍ଞାନିକମାନେ କହିଛନ୍ତି।
ଉତ୍ତରପ୍ରଦେଶ, ମହାରାଷ୍ଟ୍ର, ମଧ୍ୟପ୍ରଦେଶ, ଛତିଶଗଡ଼ରେ ‘କଡ଼କନାଥ’ ପ୍ରଜାତିର କୁକୁଡ଼ା ଚାଷୀଙ୍କ ପାଖରେ ବେଶ ଆଦୃତ ହୋଇଛି। ତାହାକୁ ଦୃଷ୍ଟିରେ ରଖି ଗତ କିଛି ମାସ ହେଲା ଓଡ଼ିଶାର ଘରୋଇ ସଂସ୍ଥା ଓ ଚାଷୀମାନେ ଏହାକୁ ଚାଷ କରିବା ଆରମ୍ଭ କରିଛନ୍ତି। ୨୦୧୮-୧୯ ଆର୍ଥିକ ବର୍ଷରେ ରାଜ୍ୟର ୩୩ଟି କୃଷି ବିଜ୍ଞାନ କେନ୍ଦ୍ର(କେଭିକେ) ଅଧୀନରେ ଏହି ପ୍ରଜାତିର କୁକୁଡ଼ା ଚାଷ କରାଯାଉଛି। ପ୍ରତି କେଭିକେରେ ୧୦ରୁ ୨୦ ଜଣ ଲେଖାଏଁ ଚାଷୀଙ୍କୁ କୁକୁଡ଼ା ଚିଆଁ ଯୋଗାଇ ଦିଆଯାଉଛି।
Prasanta Patnaik