କାଠମାଣ୍ଡୁ: ୨୦୧୯ ମସିହାରେ ଏଗାର ଜଣ ଆରୋହୀଙ୍କ ମୃତ୍ୟୁ ଘଟିବା କାରଣରୁ ନେପାଳ ସରକାର ଏଭରେଷ୍ଟ ଶୃଙ୍ଗ ଆରୋହଣ ନିମନ୍ତେ ଦେଉଥିବା ଅନୁମତି ପ୍ରକ୍ରିୟାରେ କେତେକ ପରିବର୍ତ୍ତନ ଲାଗି ପ୍ରସ୍ତାବ ଦେଇଛନ୍ତି।
ପ୍ରସ୍ତାବିତ ପରିବର୍ତ୍ତନର ପ୍ରଥମ ନିୟମଟି ହେଉଛି- ଆରୋହୀମାନେ ନେପାଳର ଅନ୍ୟୂନ ୬, ୫୦୦ ମିଟରବିଶିଷ୍ଟ ଶୃଙ୍ଗଟିଏ ଆରୋହଣ କରିଥିବାର ପ୍ରମାଣପତ୍ର ଦାଖଲ କରିବା ଜରୁରୀ। କିନ୍ତୁ, ସମାଲୋଚକମାନେ କହୁଛନ୍ତି କି, ଏ ଭଳି କଟକଣା କଲେ କିଛି ଲାଭ ନାହିଁ; ସ୍ୱାସ୍ଥ୍ୟ ଭଲ ଅଛି ବୋଲି ଆରୋହୀମାନେ ପ୍ରମାଣପତ୍ର ଦାଖଲ କରିବା ଅତ୍ୟାବଶ୍ୟକ।
ଏହାକୁ ମଧ୍ୟ ଅନ୍ୟ କେତେକ ସମାଲୋଚନା କରି କହୁଛନ୍ତି: ଜାଲ୍ ଡାକ୍ତରୀ ସାର୍ଟିଫିକେଟ ମଧ୍ୟ ଦାଖଲ କରିବା କିଛି ବଡ଼ କଥା ନୁହେଁ। ବରଂ ଉଚ୍ଚ ପର୍ବତ ଆରୋହଣ ଆୟୋଜନରେ ତିନି ବର୍ଷର ଅଭିଜ୍ଞତା ଥିବା ଗାଇଡ୍ ବ୍ୟବସ୍ଥା କଲେ ଠିକ୍ ହେବ।
ଏ କଥାକୁ ମଧ୍ୟ ଆହୁରି କେତେକ ସମାଲୋଚନା କରି କହୁଛନ୍ତି ଯେ ଏ ଭଳି ଅଭିଜ୍ଞତା ଅଛି ବୋଲି ଶେର୍ପାମାନେ ଦାବି କରିବେ ଏବଂ ଆରୋହଣ ନିମନ୍ତେ ସମସ୍ତେ ଯୋଗ୍ୟ ବିବେଚିତ ହୋଇଯିବେ।
ଏ ସଂକ୍ରାନ୍ତରେ ଆମେରିକୀୟ ପର୍ବତାରୋହୀ ଆଲାନ୍ ଆର୍ଣ୍ଣେଟ୍ କହନ୍ତି: ଏ କଥା ମୁଁ ଅନେକ ଥର ଦେଖିଲିଣି। ୨୦୧୩ ଠାରୁ ପ୍ରତିବର୍ଷ କିଛି ନା କିଛି ଅଘଟଣ ଘଟୁଛି ଏବଂ ନେପାଳ ସରକାର ନୂଆ ନୀତିନିୟମ ଘୋଷଣା କରୁଛନ୍ତି, କିନ୍ତୁ କେବେ ସେସବୁ ପ୍ରଣୟନ କରୁ ନାହାନ୍ତି।
ଏ ଭଳି ସମାଲୋଚନା ମଧ୍ୟରେ ଏଭରେଷ୍ଟ୍ ଆରୋହଣ ନିମନ୍ତେ ପ୍ରସ୍ତାବିତ ନୂତନ ନୀତିନିୟମଗୁଡ଼ିକୁ ଅନୁମୋଦ କରାଇବାକୁ କ୍ୟାବିନେଟ୍ରେ ଦାଖଲ କରାଯାଇଛି ବୋଲି ନେପାଳ ସରକାରଙ୍କ ପର୍ଯ୍ୟଟନ ବିଭାଗରେ ପର୍ବତାରୋହଣ କାର୍ଯ୍ୟକଳାପ ବୁଝାଶୁଝା କରୁଥିବା ମୀରା ଆଚାର୍ଯ୍ୟ ଗଣମାଧ୍ୟମକୁ କହିଛନ୍ତି।
Prasanta Patnaik