ଚନ୍ଦ୍ରଶେଖରପୁର : ଆଜି ଚନ୍ଦ୍ରଶେଖରପୁର ପଦ୍ମଜା ହୋଟେଲ୍ରେ ଉତ୍କଳ ଔଷଧ ବ୍ୟବସାୟୀ ସଂଘ(ୟୁସିଡିଏ)ର ନିର୍ବାଚନ ପାଇଁ ମତଦାନ ଚାଲିଥିବା ବେଳେ କିଛି ଦୁର୍ବୃତ୍ତ ଭୋଟ୍ବାକ୍ସ ଉଠାଇ ନେଇ ଯାଇଥିବା ଅଭିଯୋଗ ହୋଇଛି। ଏନେଇ ସଂଘର ସଭାପତି ପି.ସତ୍ୟନାରାୟଣ ରେଡ୍ଡୀ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିଛନ୍ତି। ତାଙ୍କ ଅଭିଯୋଗ ଅନୁଯାୟୀ, ସଂଘର ୨୦୧୯ରୁ ୨୦୨୨ବର୍ଷ ପାଇଁ ମତଦାନ ଚାଲିଥିବା ବେଳେ ୫/୬ଜଣ ଯୁବକ ହଠାତ ହୋଟେଲ୍ ହଲ୍ ଭିତରକୁ ପଶି ଆସି ବାଲଟ୍ କାଗଜ ଓ ବାଲଟ୍ ବାକ୍ସ ଉଠାଇ ନେଇଥିଲେ। ସେମାନଙ୍କ ନିକଟରେ ବନ୍ଧୁକ ଥିବାରୁ ଉପସ୍ଥିତ ସଭ୍ୟମାନେ ପ୍ରତିରୋଧ ନ କରି ପୁଲିସ୍ ଓ ହୋଟଲ୍ କର୍ମଚାରୀଙ୍କୁ ସୂଚନା ଦେଇଥିଲେ। ପୁଲିସ୍ ଦୁର୍ବୃତ୍ତଙ୍କୁ ଚିହ୍ନଟ କରିବା ପାଇଁ ସିସିଟିଭି ଫୁଟେଜ୍ ତଦନ୍ତ କରିବ ବୋଲି ଜଣାପଡ଼ିଛି।
ସଂଘର ସଭ୍ୟ ପ୍ରସନ୍ନ ମହାପାତ୍ରଙ୍କ ସୂଚନା ମୁତାବକ ପ୍ରଥମେ ଅନୁଗୁଳ, ବରଗଡ଼ ଓ କେନ୍ଦୁଝର ଜିଲ୍ଲା ଏକ୍ଜିକ୍ୟୁଟିଭ୍ ମେମ୍ବରମାନେ ମତଦାନ କଲା ପରେ ଏହି ଘଟଣା ଘଟିଥିଲା। ତେଣୁ ଏନେଇ ଥାନାରେ ଅଭିଯୋଗ ଦିଆଯାଇଥିଲା। ପୁଲିସ୍ ହୋଟେଲ୍ ବାହାରେ ପାଟ୍ରୋଲିଂ କରିବା ପରେ ରାତି ପ୍ରାୟ ୮ଟା ପରେ ପୁଣି ମତଦାନ ଚାଲିଥିଲା।
Prasanta Patnaik