ଇ-ଟେଣ୍ଡର ପାଇଁ ଓଡ଼ିଶାକୁ ପୁରସ୍କାର

ରାଜ୍ୟ ସରକାରଙ୍କ ପକ୍ଷରୁ କୁହାଯାଇଛି, ପୂର୍ତ ବିଭାଗର ମୁଖ୍ୟଯନ୍ତ୍ରୀଙ୍କ ଅଧ୍ୟକ୍ଷତାରେ ରାଜ୍ୟରେ କାର୍ଯ୍ୟକରୁଥିବା ଇ-ପ୍ରୋକ୍ୟୁରୋମେଣ୍ଟ ସେଲ୍ ର ଉତ୍ସର୍ଗୀକୃତ କାର୍ଯ୍ୟପାଇଁ ଜାତୀୟ ସ୍ତରରେ ଓଡିଶାକୁ ଏଭଳି ସଫଳତା ମିଳିଛି। ଏହି ସେଲରେ ସମସ୍ତ ସରକାରୀ ବିଭାଗ, ରାଷ୍ଟ୍ରାୟତ ସଂସ୍ଥା, ସରକାରୀ ଉଦ୍ୟୋଗ ଓ ପୌରସଂସ୍ଥାର ଅଧିକାରୀ ମାନେ ଅଛନ୍ତି। ବର୍ତ୍ତମାନ ରାଜ୍ୟରେ ୫ଲକ୍ଷ ଟଙ୍କାରୁ ଅଧିକ ମୂଲ୍ୟର ଟେଣ୍ଡର ପାଇଁ ଇ-ପ୍ରୋକ୍ୟୁରମେଣ୍ଟ ବ୍ୟବସ୍ଥା ବାଧ୍ୟତାମୂଳକ ହୋଇଛି। ପୌରସଂସ୍ଥା ଗୁଡିକରେ ଏକ ଲକ୍ଷ ଟଙ୍କାରୁ ଅଧିକ କାମ ମଧ୍ୟ ଏହି ପ୍ରକ୍ରିୟାରେ ହେବାର ନିୟମ ରହିଛି। ୨୦୧୭ ଡିସେମ୍ବରରୁ ଟେଣ୍ଡର ପେପର ବାବଦୀୟ ଅର୍ଥ ଏବଂ ଅମାନତ ଜମା ରାଶି ଅନ ଲାଇନ ମାଧ୍ୟମରେ ଗ୍ରହଣ କରାଯାଉଛି। ୨୦୦୮ ରୁ ୨୦୧୭ ମାର୍ଚ୍ଚ ୩୧ ମଧ୍ୟରେ ୧,୮୯,୨୧୩ ଟି ଟେଣ୍ଡର ଇ-ପୋର୍ଟାଲ ମାଧ୍ୟମରେ ଜାରି ହୋଇଥିବାବେଳେ କେବଳ ଗତ ଆର୍ଥିକ ବର୍ଷରେ ଏହି ସଂଖ୍ୟା ୩୭,୫୩୩ ଥିବା ଜଣାଯାଇଛି।

ଏଠାରେ ଉଲ୍ଲେଖଥାଉକି, କଣ୍ଟ୍ରାକ୍ଟର ଡାଟା ବେସ୍ ମ୍ୟାନେଜମେଣ୍ଟ ସିଷ୍ଟମ ପାଇଁ ଚଳିତବର୍ଷ ପଦକ୍ଷେପ ନିଆଯାଉଛି। ଏହା ମାଧ୍ୟମରେ ରାଜ୍ୟର ସମସ୍ତ ଠିକାଦାରମାନଙ୍କ ସୂଚନା ଗୋଟିଏ ସ୍ଥାନରେ ରହିବ। ଏହି ତଥ୍ୟକୁ ୱାର୍କସ ଆକାଉଣ୍ଟିଙ୍ଗ୍ ମ୍ୟାନେଜମେଣ୍ଟ ସିଷ୍ଟମ (ଡବ୍ଲ୍ୟୁଏଏମ୍ଆଇଏସ୍) ସହିତ ଯୋଡାଯିବ। ଫଳରେ କୌଣସି ଟେଣ୍ଡରର ବୈଷୟିକ ବିଡ୍ ଚୂଡାନ୍ତ ସମୟରେ ଠିକାଦାରମାନଙ୍କ ଯୋଗ୍ୟତା ଓ ଦକ୍ଷତା ସଂକ୍ରାନ୍ତରେ ତତ୍କାଳ ସୂଚନା ମିଳିପାରିବ।