୨୨ ବର୍ଷ ଜେଲରେ ଥିଲା, ନାଁରେ ରହିଛି ୧୪୨ଟି ମାମଲା, ଓଡ଼ିଶାରୁ ଗିରଫ କଲା ଦିଲ୍ଲୀ ପୁଲିସ୍‌

ଉକ୍ତ ଅପରାଧୀର ନାଁ ଯୋଗେନ୍ଦ୍ର ଓରଫ ଜଗା। ତା’କୁ ଦିଲ୍ଲୀର ସାଗରପୁର ଅଞ୍ଚଳରେ ଘଟିଥିବା ଏକ ହତ୍ୟା ମାମଲାରେ ଗିରଫ କରାଯାଇଛି। ଜଗା ସହ ତା’ ପତ୍ନୀକୁ ମଧ୍ୟ ପୁଲିସ୍‌ ଗିରଫ କରିଛି। ଏହି ହତ୍ୟାକାଣ୍ଡ ପରେ ଜଗା ଓ ତା’ ପତ୍ନୀ ଦିଲ୍ଲୀରୁ ଓଡ଼ିଶା ଚାଲି ଆସିଥିଲେ।

ଦିଲ୍ଲୀ ପୁଲିସ୍‌ କୌଣସି ସୂତ୍ରରୁ ଖବର ପାଇ ଉଭୟଙ୍କୁ ଗିରଫ କରିଛି। ତେବେ ଜଗା ସାଗରପୁର ହତ୍ୟାକାଣ୍ଡରେ ସଂପୃକ୍ତ ନଥିବା କହିଛି। ହେଲେ ସେ ୨୨ ବର୍ଷ ଜେଲରେ ଥିଲା ଏବଂ ବିଭିନ୍ନ ଥାନାରେ ତା’ ନାଁରେ ୧୦୦ରୁ ଅଧିକ ମାମଲା ରୁଜୁ ହୋଇଥିବା ସ୍ୱୀକାର କରିଛି।

ପୁଲିସ୍‌ର ସୂଚନା ଅନୁଯାୟୀ, ଜଗା ଓ ତା’ ପରିବାର ବିଭିନ୍ନ ମାମଲାରେ ସଂପୃକ୍ତ ରହିଛନ୍ତି। ହତ୍ୟା ପରେ ସେ ଦିଲ୍ଲୀ ଛାଡ଼ି ଦେଇଥିଲା। ତେବେ ଓଡ଼ିଶାର ଏକ ନକ୍ସଲ ପ୍ରବଣ ଅଞ୍ଚଳରେ ସେ ଓ ତା’ର ପତ୍ନୀ ଲୁଚିଥିବା ଖବର ମିଳିଥିଲା। ଆମେ ସେଠାରୁ ତା’କୁ ଗିରଫ କରିଛୁ ବୋଲି ପୁଲିସ୍‌ ପକ୍ଷରୁ କୁହାଯାଇଛି।