୧୨ ମୋବାଇଲ୍ ଜବତ, ୫ ନାବାଳକ ଗିରଫ

ରାଉରକେଲା, ୨୮ା୮ : ମୋବାଇଲ୍ ମରାମତି ଦୋକାନରୁ ଚୋରି ଅଭିଯୋଗରେ ପ୍ଲାଣ୍ଟସାଇଟ୍ ପୁଲିସ ୫ ଜଣ ନାବାଳକଙ୍କୁ ଗିରଫ କରିଛି । ସେମାନଙ୍କ ନିକଟରୁ ୧୨ଟି ଚୋରି ମୋବାଇଲ୍ ଜବତ କରିଛି । ବିଶ୍ରା ଛକ ବନ୍ଧମୁଣ୍ଡା ରାସ୍ତାରେ ବାବୁ ଶଙ୍କର ନାମକ ଜଣେ ଯୁବକ ଏକ ମୋବାଇଲ୍ ମରାମତି ଦୋକାନ କରିଛନ୍ତି ।

ଦୁଇଦିନ ତଳେ ଦୋକାନର ତାଲା ଭାଙ୍ଗି ଚୋରମାନେ ୧୨ଟି ମୋବାଇଲ୍, ଚାର୍ଜର ସମେତ ଅନ୍ୟାନ୍ୟ ମୋବାଇଲ୍ ଯନ୍ତ୍ରାଂଶ ଚୋରି କରି ନେଇଥିଲେ । ଏ ସମ୍ପର୍କରେ ଦୋକାନୀ ମାଲିକ ଥାନାରେ ଅଭିଯୋଗ କରିଥିଲେ । ପୁଲିସ୍ ଘଟଣାର ଅନୁସନ୍ଧାନ କରି ଆଜି ୫ ଜଣ ନାବାଳକଙ୍କୁ ଗିରଫ କରିଛି । ସେମାନେ ସମସ୍ତେ ଗୋପବନ୍ଧୁପାଲୀ ଅଞ୍ଚଳର ବୋଲି ଜଣାପଡିଛି । ଆଜି ସେମାନଙ୍କୁ ବାଳସୁଧାର ଗୃହକୁ ଚାଲାଣ କରାଯାଇଛି ।