ହରିଆଣା: ରୋହତକର କୁସ୍ତି ଆଖଡାରେ ଗୁଳିକାଣ୍ଡ, ୩ ବର୍ଷର ଶିଶୁ ସମେତ ୫ ମୃତ

ଚଣ୍ଡୀଗଡ଼, ଫେବୃଆରୀ ୧୩ : ହରିଆଣାର ରୋହତକରେ ଶୁକ୍ରବାର ସନ୍ଧ୍ୟାରେ ଏକ ଘରୋଇ କଲେଜ ନିକଟରେ ଥିବା କୁସ୍ତି ଆଖଡାରେ ଗୁଳିକାଣ୍ଡ ହୋଇଛି । ଏହି ଗୁଳିକାଣ୍ଡରେ ୫ ଜଣଙ୍କର ମୃତ୍ୟୁ ହୋଇଛି । ଅନ୍ୟ କିଛି ଲୋକ ଆହତ ହୋଇଥିବାରୁ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ମୃତକମାନଙ୍କ ଭିତରେ ଜଣେ ୩ ବର୍ଷର ଶିଶୁ ମଧ୍ୟ ରହିଛି । 

ରୋହତକ ପୋଲିସ ଅଧୀକ୍ଷକ ରାହୁଲ ଶର୍ମା କହିଛନ୍ତି, ଗୁଳିକାଣ୍ଡ ଘଟଣାରେ ମୃତ୍ୟୁ ସଂଖ୍ୟା ୫କୁ ବୃଦ୍ଧି ପାଇଛି । କିଛି ଲୋକଙ୍କର ହସ୍ପିଟାଲରେ ଚିକିତ୍ସା ଜାରି ରହିଛି । ଘଟଣା ସଂପର୍କରେ ତଥ୍ୟ ଯୋଗାଡ଼ ପାଇଁ ଆମର ପୋଲିସ ଟିମ କାମ କରୁଛି । ରୋହତକ ରେଂଜର ଆଇଜି ସଂଦୀପ ଖିରୱାର କହିଛନ୍ତି ଯେ, ଫରେନସିକ ବିଶେଷଜ୍ଞ ଓ ପୋଲିସ ଟିମ ଘଟଣାସ୍ଥଳରେ ତଦନ୍ତ କରୁଛନ୍ତି । ମୃତକଙ୍କ ମଧ୍ୟରେ କୁସ୍ତି ପ୍ରଶିକ୍ଷକଙ୍କର ମଧ୍ୟ ମୃତ୍ୟୁ ହୋଇଛି । ପୂର୍ବ ଶତ୍ରୁତାକୁ ନେଇ ଏହି ଗୁଳିକାଣ୍ଡ ହୋଇଥିବା ପୋଲିସ ଅନୁମାନ କରୁଛି ।