ଭୁବନେଶ୍ବର : ରାଜ୍ୟରେ ଥିବା ସମସ୍ତ ଡିଗ୍ରି, ସ୍ବୟଂଶାସିତ ମହାବିଦ୍ୟାଳୟ ସମେତ ସରକାରୀ ବିଶ୍ବବିଦ୍ୟାଳୟମାନଙ୍କରେ ଏଥର ଗୋଟିଏ ସମୟରେ ଛାତ୍ର ସଂସଦ ନିର୍ବାଚନ ହେବ। ସେପ୍ଟେମ୍ବର ତୃତୀୟ ସପ୍ତାହରୁ ନିର୍ବାଚନ ପ୍ରକ୍ରିୟା ଆରମ୍ଭ ନେଇ ବିଜ୍ଞପ୍ତି ପ୍ରକାଶ ପାଇବ। ସେପ୍ଟେମ୍ବର ୩୦ରେ ନିର୍ବାଚନ କରାଯାଇ ସେହିଦିନ ହିଁ ଫଳାଫଳ ପ୍ରକାଶ କରାଯିବ। ପରଦିନ ଅର୍ଥାତ୍ ଅକ୍ଟୋବର ପହିଲାରେ ଶପଥ ଗ୍ରହଣ ଉତ୍ସବ କରିବାକୁ ନିଷ୍ପତ୍ତି ନେଇଛି ଉଚ୍ଚଶିକ୍ଷା ବିଭାଗ। ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ କରାଯାଇ ନ ଥିଲେ ମଧ୍ୟ ଉଚ୍ଚଶିକ୍ଷା ବିଭାଗ ପକ୍ଷରୁ ୨୦୧୯-୨୦ ମସିହା ପାଇଁ ଆଜି ପ୍ରକାଶିତ କମନ୍ ମିନିମମ୍ ଷ୍ଟାଣ୍ଡାର୍ଡ(ସିଏମ୍ଏସ୍) ଗାଇଡ୍ଲାଇନ୍ରେ ପରୋକ୍ଷରେ ଏଭଳି ସୂଚନା ଦିଆଯାଇଛି।
ବିଭାଗ ପକ୍ଷରୁ ପ୍ରକାଶିତ ଗାଇଡ୍ଲାଇନ୍ରେ କେଉଁ ମାସରେ କ’ଣ ହେବ ସେନେଇ ସ୍ପଷ୍ଟ କରାଯାଇଛି। ସେପ୍ଟେମ୍ବର ୭, ୧୪ ଓ ୨୧ ତାରିଖରେ ଯଥାକ୍ରମେ ଯୁକ୍ତ୩ ପ୍ରଥମ, ଦ୍ବିତୀୟ ଓ ତୃତୀୟ ବର୍ଷ ଛାତ୍ରଛାତ୍ରୀଙ୍କ ଅଭିଭାବକ-ଶିକ୍ଷକ ବୈଠକ ଅନୁଷ୍ଠିତ ହେବ। ଏହାପରେ ଗୋଟିଏ ସମୟରେ ସମସ୍ତ କ୍ୟାମ୍ପସରେ ଛାତ୍ର ସଂସଦ ନିର୍ବାଚନ କରାଯାଇ ଅକ୍ଟୋବର ପହିଲା ସୁଦ୍ଧା ଏହି ପ୍ରକ୍ରିୟା ଶେଷ କରାଯିବ। ୩ରୁ ୧୩ ତାରିଖ ପର୍ଯ୍ୟନ୍ତ ଦଶହରା ଛୁଟି ହେବ। ଏଥର ଚୂଡ଼ାନ୍ତ ସେମିଷ୍ଟାର ପରୀକ୍ଷା ପୂର୍ବରୁ ମିଡ୍ ସେମିଷ୍ଟାର ପରୀକ୍ଷା କରାଯିବ। ସେପ୍ଟେମ୍ବର ଶେଷ ସପ୍ତାହ ଓ ୨୦୨୦ ଫେବ୍ରୁଆରି ପ୍ରଥମ ସପ୍ତାହରେ ମିଡ୍ ସେମିଷ୍ଟାର ପରୀକ୍ଷା ହେବ। ଶେଷ ସେମିଷ୍ଟାର ପରୀକ୍ଷା ଡିସେମ୍ବର ପ୍ରଥମ ଓ ଏପ୍ରିଲ ଶେଷ ସପ୍ତାହରେ ହେବ। ଡିସେମ୍ବର ୨୫ରୁ ଏକ୍ସ-ମାସ୍ ଛୁଟି ହେବ ବୋଲି ଗାଇଡ୍ଲାଇନ୍ରେ କୁହାଯାଇଛି।
Prasanta Patnaik