ନୂଆଦିଲ୍ଲୀ: ସର୍ଟ ଭିଡିଓ ପ୍ଲାଟଫର୍ମ ଟିକଟକକୁ କ୍ରୟ କରିବା ନେଇ ଆଲୋଚନା ଜାରି ରହିବ ଏବଂ ସେପ୍ଟେମ୍ବର ୧୫, ୨୦୨୦ ସୁଦ୍ଧା ମାଇକ୍ରୋସଫ୍ଟ ଟିକ୍-ଟକକୁ କିଣିବ। ରବିବାର ଏ ନେଇ ଘୋଷଣା କରିଛି ମାଇକ୍ରୋସଫ୍ଟ । ସତ୍ୟ ନାଡେଲାଙ୍କ ନେତୃତ୍ୱାଧୀନ କମ୍ପାନୀ ଏକ ବ୍ଲଗ୍ ପୋଷ୍ଟରେ ପ୍ରକାଶ କରିଛି ଯେ, ମାଇକ୍ରୋସଫ୍ଟ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ସୁରକ୍ଷା ସମ୍ପର୍କରେ ଆଲୋଚନା କରିଛି ଏବଂ ଟିକ୍-ଟକର ମୂଳ କମ୍ପାନୀ ବାଇଟେଡାନ୍ସ ସହିତ ସେପ୍ଟେମ୍ବର ୧୫, ୨୦୨୦ ସୁଦ୍ଧା ଏହି ଚୁକ୍ତିନାମାକୁ ସିଲ୍ କରିବାକୁ ଯୋଜନା କରିଛି।
ବ୍ଲଗରେ ଲେଖାଯାଇଛି କି, “ମାଇକ୍ରୋସଫ୍ଟ ସମ୍ପୂର୍ଣ୍ଣ ସୁରକ୍ଷା ସମୀକ୍ଷା ସହ ଟିକ୍-ଟକକୁ ହାସଲ କରିବା ଏବଂ ଯୁକ୍ତରାଷ୍ଟ୍ରର ଟ୍ରେଜେରୀ ସମେତ ଆମେରିକାକୁ ଉପଯୁକ୍ତ ଅର୍ଥନୈତିକ ସୁବିଧା ପ୍ରଦାନ କରିବାକୁ ପ୍ରତିଶ୍ରୁତିବଦ୍ଧ | ମାଇକ୍ରୋସଫ୍ଟ କିଛି ସପ୍ତାହ ମଧ୍ୟରେ ଟିକ୍-ଟକର ମୂଳ କମ୍ପାନୀ ବାଇଟ୍ ଡାନ୍ସ ସହିତ ଆଲୋଚନା କରିବା ପାଇଁ ଶୀଘ୍ର ଆଗକୁ ବଢ଼ିବ ଏବଂ ସେପ୍ଟେମ୍ବର ୧୫, ୨୦୨୦ ମଧ୍ୟରେ ଏହି ଆଲୋଚନା ସମାପ୍ତ କରିବ। ଏହି ପ୍ରକ୍ରିୟା ସମୟରେ ମାଇକ୍ରୋସଫ୍ଟ ଆମେରିକା ସରକାରଙ୍କ ସହ କଥାବାର୍ତ୍ତା ଜାରି ରଖିବାକୁ ଅପେକ୍ଷା କରିଛି।
ଯଦି ମାଇକ୍ରୋସଫ୍ଟ ଟିକ୍-ଟକକୁ କିଣିବାରେ ସଫଳ ହୁଏ, ତେବେ ଆମେରିକା, କାନାଡା, ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡବାସୀ ଏହାକୁ ବ୍ୟବହାର କରି ପାରିବେ। “ଦୁଇ କମ୍ପାନୀ ସେମାନଙ୍କର ପ୍ରାଥମିକ ପ୍ରସ୍ତାବ ଅନୁସନ୍ଧାନ କରିବାକୁ ନୋଟିସ୍ ପ୍ରଦାନ କରିଛନ୍ତି, ଯେଉଁଥିରେ ଆମେରିକା, କାନାଡା, ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡ ପାଇଁ ଟିକ୍-ଟକ ସେବା କ୍ରୟ ହେବ ଏବଂ ମାଇକ୍ରୋସଫ୍ଟ ଏହି ଦେଶର ବଜାରରେ ଟିକ୍-ଟକର ମାଲିକାନା ଏବଂ ପରିଚାଳନା କରିବ। ମାଇକ୍ରୋସଫ୍ଟ ଅନ୍ୟ ଆମେରିକୀୟ ନିବେଶକମାନଙ୍କୁ ଏହି କ୍ରୟରେ ସଂଖ୍ୟାଲଘୁ ଭିତ୍ତିରେ ଅଂଶଗ୍ରହଣ କରିବାକୁ ଆମନ୍ତ୍ରଣ କରିପାରେ ବୋଲି କମ୍ପାନୀର ବ୍ଲଗରେ କୁହାଯାଇଛି।
ମାଇକ୍ରୋସଫ୍ଟ ଏହା ମଧ୍ୟ କହିଛି ଯେ, ଆମେରିକୀୟ ଟିକ୍-ଟକ ବ୍ୟବହାରକାରୀଙ୍କ ସମସ୍ତ ବ୍ୟକ୍ତିଗତ ତଥ୍ୟ ଯୁକ୍ତରାଷ୍ଟ୍ରରେ ରହିବା ସହ ତଥ୍ୟ ଯେମିତି ଅନ୍ୟ କୌଣସି ଦେଶକୁ ଯିବ ନାହିଁ ସେ ନେଇ କମ୍ପାନି ନିଶ୍ଚିତ କରିବ। ଯଦି ଫ୍ଲୁକ୍ ଦ୍ୱାରା ଆମେରିକା ବାହାରକୁ ଡାଟା ଯାଏ, ମାଇକ୍ରୋସଫ୍ଟ ନିଶ୍ଚିତ କରିବ ଯେ, ଡାଟା ସ୍ଥାନାନ୍ତରିତ ହେବା ପରେ ଦେଶ ବାହାରେ ଥିବା ସର୍ଭରରୁ ଡାଟା ଡିଲିଟ୍ ହୋଇଯିବ।
Prasanta Patnaik