ନୂଆଦିଲ୍ଲୀ, ସେପ୍ଟେମ୍ବର ୦୨ : 2019 ରେ ଦେଶରେ 4,37,396 ସଡକ ଦୁର୍ଘଟଣା ଘଟିଥିଲା ଯେଉଁଥିରେ 1,54,732 ଲୋକଙ୍କର ମୃତ୍ୟୁ ଘଟିଥିଲା ଏବଂ 4,39,262 ଜଣ ଲୋକ ଆହତ ହୋଇଥିଲେ । ନ୍ୟାସନାଲ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ର ତଥ୍ୟରୁ ଏହି ସୂଚନା ମିଳିଛି । ଏହି ତଥ୍ୟ ଅନୁଯାୟୀ, 59.6 ପ୍ରତିଶତ ସଡ଼କ ଦୁର୍ଘଟଣା ‘ହାଇ ସ୍ପିଡ୍’ରେ ଗାଡି ଚଳାଇବା କାରଣରୁ ହୋଇଥିଲା, ଯେଉଁଥିରେ 86,241 ଜଣଙ୍କର ମୃତ୍ୟୁ ଘଟିଥିଲା ଏବଂ 2,71,581 ଜଣ ଆହତ ହୋଇଥିଲେ ।
2018 ମସିହାରେ 1,52,780 ଜଣଙ୍କ ସଡକ ଦୁର୍ଘଟଣାରେ ମୃତ୍ୟୁ ଘଟିଥିବାବେଳେ 2017 ମସିହାରେ 1,50,093 ଲୋକ ସଡ଼କ ଦୁର୍ଘଟଣାରେ ପ୍ରାଣ ହରାଇଥିଲେ । NCRB ତଥ୍ୟ ଅନୁଯାୟୀ, 2019 ରେ ସମୁଦାୟ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା 4,21,959 ଥିଲା, ଯେଉଁଥିରେ ସଡକ ଦୁର୍ଘଟଣା, ପ୍ରାକୃତିକ ବିପର୍ଯ୍ୟୟ ଏବଂ ମାନବ ଅବହେଳା ହେତୁ ମୃତ୍ୟୁ ସଂଖ୍ୟା ମଧ୍ୟ ସାମିଲ ଥିଲା । ସେହିଭଳି, 2018 ମସିହାରେ ଦୁର୍ଘଟଣାଜନିତ ମୋଟ ମୃତ୍ୟୁ ସଂଖ୍ୟା 4,11,104 ଥିବା ବେଳେ 2017 ମସିହାରେ ଏହି ସଂଖ୍ୟା 3,96,584 ଥିଲା ।
ତଥ୍ୟ ଅନୁଯାୟୀ, ସଡ଼କ ଦୁର୍ଘଟଣା ସମ୍ବନ୍ଧୀୟ 38 ପ୍ରତିଶତ ମାମଲା ଦୁଇ ଚକିଆ ଯାନ ସହ ଜଡିତ ଥିବାବେଳେ ଟ୍ରକ୍ କିମ୍ବା ଲୋରୀ, କାର୍ ଏବଂ ବସ୍ ସମ୍ବନ୍ଧୀୟ ମାମଲା ଯଥାକ୍ରମେ 14.6 ପ୍ରତିଶତ, 13.7 ପ୍ରତିଶତ ଏବଂ 5.9 ପ୍ରତିଶତ ଥିଲା।
ଏନସିଆରବି ତଥ୍ୟ ଅନୁଯାୟୀ, 25.7 ପ୍ରତିଶତ ଦୁର୍ଘଟଣା ଡ୍ରାଇଭିଂ କିମ୍ବା ବିପଜ୍ଜନକ କିମ୍ବା ବେପରୁଆ ଗାଡି ଚଲାଇବା ବେଳେ ହୋଇଥିବାବେଳେ ଏଥିରେ 42,557 ଜଣଙ୍କର ମୃତ୍ୟୁ ଘଟିଥିଲା ଏବଂ 1,06,555 ଆହତ ହୋଇଥିଲେ । ଏହି ଅନୁଯାୟୀ, ଖରାପ ପାଣିପାଗ କାରଣରୁ କେବଳ 2.6 ପ୍ରତିଶତ ସଡକ ଦୁର୍ଘଟଣା ଘଟିଛି।
ତଥ୍ୟ ଅନୁଯାୟୀ, 59.5 ପ୍ରତିଶତ ସଡକ ଦୁର୍ଘଟଣା ଗ୍ରାମାଞ୍ଚଳରେ ଘଟିଥିବାବେଳେ 40.5 ପ୍ରତିଶତ ଦୁର୍ଘଟଣା ସହରାଞ୍ଚଳରେ ଘଟିଛି। ଏନସିଆରବି ବାର୍ଷିକ ତଥ୍ୟ ଅନୁଯାୟୀ, 2019 ରେ ମୋଟ 27,987 ରେଳ ସମ୍ବନ୍ଧୀୟ ଦୁର୍ଘଟଣା ଘଟିଛି ଯେଉଁଥିରେ 3,569 ଜଣଙ୍କର ମୃତ୍ୟୁ ଘଟିଛି ଏବଂ 24,619 ଜଣ ଆହତ ହୋଇଛନ୍ତି।
ସେହିଭଳି ଗତ ବର୍ଷ ରେଳ କ୍ରସିଂର 1,788 ଦୁର୍ଘଟଣା ରେକର୍ଡ କରାଯାଇଥିଲା, ଏବଂ ଏହି ଦୁର୍ଘଟଣାରେ 1,762 ଜଣଙ୍କର ମୃତ୍ୟୁ ଘଟିଥିବାବେଳେ ଏବଂ 165 ଜଣ ଆହତ ହୋଇଥିଲେ । ତଥ୍ୟ ଅନୁଯାୟୀ, ଉତ୍ତରପ୍ରଦେଶରେ ସର୍ବାଧିକ ରେଳ କ୍ରସିଂ ଦୁର୍ଘଟଣା ଘଟିଛି (1,788 ମଧ୍ୟରୁ 851)।
Prasanta Patnaik