ସାଂସଦଙ୍କ ଅଭିଯୋଗ ଶୁଣିଲା ନାହିଁ ପୁଲିସ୍, ଟ୍ୱିଟ କରି କମିସନରେଟ୍ ପୁଲିସର ଦୃଷ୍ଟି ଆକର୍ଷଣ କଲେ ଅନୁଭବ

କଟକ : କେନ୍ଦ୍ରାପଡ଼ା ସାଂସଦ ତଥା ଓଲିଉଡ଼୍ ଅଭିନେତା ଅନୁଭବ ମହାନ୍ତିଙ୍କ ଅଭିଯୋଗକୁ ପୁଲିସ  ଅଣଦେଖା କରିଥିବା ଅଭିଯୋଗ ହୋଇଛି । ପଡ଼ୋଶୀଙ୍କ ଉତ୍ପାତ ନେଇ ଅନୁଭବ ମହାନ୍ତିଙ୍କ ଗତ ରାତିରେ କଟକ ପୁରୀଘାଟ ଥାନା ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ । ଘଟଣା ଘଟିବାର ଏତେ ସମୟ ବିତିଯାଇଥିଲେ ହେଁ ପୁଲିସ୍ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରି ଚୁପ୍ ବସିଛି । ଉତ୍ପାତ କରୁଥିବା ଯୁବକଙ୍କୁ ଗିରଫ କରିବା ବଦଳରେ କଟକ ପୁରୀଘାଟ ଥାନା ଅଧିକାରୀ ତାଙ୍କୁ ଦୁର୍ବ୍ୟବହାର କରିଥିବା ମଧ୍ୟ ଅଭିଯୋଗ କରିଛନ୍ତି ଅନୁଭବ ମହାନ୍ତି । ଘଟଣାକୁ ନେଇ  ଟ୍ୱିଟରରେ ପୁଲସ୍ କମିସନରଙ୍କ ଦୃଷ୍ଟି ଆକର୍ଷଣ କରିଛନ୍ତି ସାଂସଦ।

ସୂଚନା ଅନୁସାରେ ଗତ ରାତିରେ ଅନୁଭବ ମହାନ୍ତିଙ୍କ କଟକ ନନ୍ଦିସାହି ସ୍ଥିତ ବାସଭବନ  ଆଗରେ ପଡ଼ୋଶୀ ଯୁବକ ମଞ୍ଜିତ ଦାସ ଗାଳି ଗୁଲଜ କରିବା ସହ ଗଣ୍ଡଗୋଳ କରିଥିଲେ । ଅନୁଭବ ମହାନ୍ତି ଘଟଣାସ୍ଥଳକୁ ଆସି ସମସ୍ୟା ସମାଧାନ କରିବାକୁ  ଚେଷ୍ଟା କରିଥିଲେ ।  ହେଲେ ଗଣ୍ଡଗୋଳ କରିଥିବା ଯୁବକ ଜଣଙ୍କ ତାଙ୍କୁ ଦୁର୍ବ୍ୟବହାର କରିବା ସହ ଗାଳିଗୁଲଜ କରିଥିଲେ । ତେବେ ଏହି ଘଟଣା ନେଇ ଅନୁଭବ ମହାନ୍ତି ପୁଲିସଙ୍କୁ ଫୋନ୍ କରିଥିଲେ ହେଁ, ବିଳମ୍ବରେ ପହଞ୍ଚିଥିଲା ପୋଲିସ୍ । ବିଳମ୍ବରେ ପହଞ୍ଚିବା ପରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରିନଥିଲା । ଏପରିକି ଓଲଟି ସାଂସଦ ଅନୁଭବ ମହାନ୍ତିଙ୍କୁ କଟକ ପୁରୀଘାଟ ଥାନା ଆଇଆଇସି ଦୁର୍ବ୍ୟବହାର କରିଥଲେ ।

ବିଡ଼ମ୍ବନାର ବିଷୟ ହେଲା, ଅଭିଯୋଗ କରିବାର ଏତେ ସମୟ ପରେ ବି ସଂପୃକ୍ତ ଯୁବକଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ଏହି ଘଟଣାକୁ ନେଇ ଅସେନ୍ତୋଷ ପ୍ରକାଶ କରିଛନ୍ତି ସାଂସଦ ଅନୁଭବ ମହାନ୍ତି । ପ୍ରତ୍ୟେକ୍ଷଦର୍ଶୀ ମଧ୍ୟ ସମାନ କଥା କହୁଛନ୍ତି । ସ୍ଥାନୀୟ ଲୋକଙ୍କର କିଛି ଭିଡ଼ିଓ ଓ ପ୍ରତ୍ରିକ୍ରିୟା ମଧ୍ୟ ସାଂସଦ ଟ୍ୱିଟରରେ ପୋଷ୍ଟ କରିଛନ୍ତି । ଏହି ଘଟଣାକୁ ନେଇ କମିସନରେଟ୍ ପୁଲିସକୁ ଟ୍ୟାଗ୍ କରି ସାହାଯ୍ୟର ଅପେକ୍ଷା  କରିଛନ୍ତି ସାଂସଦ ଅନୁଭବ ମହାନ୍ତି ।