ସମ୍ବଲପୁର, ଜାନୁଆରୀ ୨୨ : ଶୁକ୍ରବାର ବିଳମ୍ବିତ ରାତିରେ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟର ପୁରୁଷ ମେଡିସିନ୍ ୱାର୍ଡରେ ପଶି ରୋଗୀଙ୍କୁ ଇଞ୍ଜେକ୍ସନ ଦେବା ଘଟଣାରେ ସୋମବାର ଟାଉନ ପୁଲିସ ଏଏନଗୁହା ଲେନ୍ ନୟାପଡ଼ାର ଲିଲି ଜାଲଙ୍କୁ ଗିରଫ କରି କୋର୍ଟଚାଲାଣ କରିଛି। ଏହି ଘଟଣା ସେତେବେଳେ ଡ୍ୟୁଟିରେ ଥିବା ସିକ୍ୟୁରିଟି ଗାର୍ଡ ପ୍ରେମାନନ୍ଦ ବିନିତଙ୍କୁ ବହିଷ୍କାର ଏବଂ ନର୍ସ ରଜନୀ ସାହୁଙ୍କୁ ନିଲମ୍ବନ କରାଯାଇଛି।
ଏସଡିପିଓ ଭବାନୀ ଶଙ୍କର ଉଦ୍ଗାତାଙ୍କ ସୂଚନା ମୁତାବକ, ଗତ ୧୯ ତାରିଖ ଦିନ ରାତିରେ ଲିଲି ତାଙ୍କ ଘରେ ଥିବା ବେଳେ କୌଣସି କାରଣକୁ ନେଇ କଳହ ହୋଇଥିଲା। ସ୍ବାମୀ ମଧ୍ୟ ଅନ୍ୟତ୍ର ବାହାରି ଯିବା ପରେ ଲିଲି ହଠାତ୍ ଡାକ୍ତରଖାନାକୁ ଚାଲି ଆସିଥିଲେ। ନର୍ସଙ୍କ ଡ୍ୟୁଟି ରୁମ୍ରେ ସେ ପ୍ରାୟ ୧ ଘଣ୍ଟା ରହିବା ପରେ ସିକ୍ୟୁରିଟି ଗାର୍ଡ ସହିତ ୱାର୍ଡକୁ ଯାଇ ଇଞ୍ଜେକ୍ସନ ଓ ସାଲାଇନ୍ ଦେଇଥିଲେ। ଏନେଇ ଟାଉନ ଥାନାରେ ଏକ ମାମଲା ରୁଜୁ ହୋଇ ଲିଲିଙ୍କୁ କୋର୍ଟ ଚାଲାଣ କରାଯାଇଛି ବୋଲି ଶ୍ରୀ ଉଦ୍ଗାତା ସୂଚନା ଦେଇଛନ୍ତି।
ଅନ୍ୟପକ୍ଷରେ, ଜିଲ୍ଲା ସ୍ବାସ୍ଥ୍ୟ ଅଧିକାରୀ ଡା.କେ.କେ.ଗୁପ୍ତାଙ୍କ ନିର୍ଦେଶକ୍ରମେମ ଏଡିଏମ୍ଓ(ମେଡିକାଲ) ଡା.ଅଶୋକ କୁମାର ଦାସଙ୍କ ନେତୃତ୍ବରେ ୨ ଜଣିଆ ତଦନ୍ତକାରୀ କମିଟି ଗଠନ କରାଯାଇଛି। ସିସିଟିଭି ଫୁଟେଜ ଓ ପାରିପାର୍ଶ୍ବିକ ପରିସ୍ଥିତିକୁ ଅନୁଧ୍ୟାନ କରି କମିଟି ୨ ଦିନ ମଧ୍ୟରେ ରିପୋର୍ଟ ଦେବ। ତେବେ ଏହି ଘଟଣାକୁ ନେଇ ରହିଥିବା ସମସ୍ତ ରହସ୍ୟ ଖୁବ୍ଶୀଘ୍ର ସାମ୍ନାକୁ ଆସିବ ବୋଲି ଜିଲ୍ଲା ସ୍ବାସ୍ଥ୍ୟ ଅଧିକାରୀ ଡା.ଗୁପ୍ତା କହିଛନ୍ତି।
Prasanta Patnaik