ଭୁବନେଶ୍ବର, ଜାନୁୟାରୀ ୦୨ : ରାଜ୍ୟ ସଚିବାଳୟ ଆଜି ବେଶ୍ ଚଳଚଞ୍ଚଳ ଥିଲା। ଯୁଆଡ଼େ ଚାହିଁବ, ସିଆଡ଼େ ଦଳ ଦଳ ହୋଇ ଲୋକ ଯା’ଆସ କରୁଥିଲେ। କାହା ହାତରେ ଥିଲା ଫୁଲ ତ ଆଉ କାହା ହାତରେ ମିଠା। ପୁଣି କିଏ ଧରିଥିଲା ଡାଏରି। କର୍ମଚାରୀଙ୍କ ସଂଖ୍ୟା ସ୍ବାଭାବିକ ଥିଲା। ବାହାର ଲୋକଙ୍କ ସଂଖ୍ୟା ଅନ୍ୟ ଦିନ ଅପେକ୍ଷା ଢେର୍ ଅଧିକ ଥିଲା। ୨୦୧୯ର ପ୍ରଥମ ଦିନରେ ସଚିବାଳୟରେ ଏମିତି ଦୃଶ୍ୟ ଦେଖିବାକୁ ମିଳିଥିଲା। ଦିନତମାମ ଏକ ନିଆରା ଅନୁଭବ ମିଳୁଥିଲା ପାୱାର୍ କରିଡର୍ରେ।
୧୧ଟା ସୁଦ୍ଧା ସବୁ ବିଭାଗରେ ଉପସ୍ଥାନ ସ୍ବାଭାବିକ ହୋଇଯାଇଥିଲା। କିନ୍ତୁ ଚେୟାର ଖାଲି ପଡ଼ିଥିଲା। କେହି କାମ କରିବାକୁ ମୁଡ୍ରେ ନ ଥିଲେ। ପରସ୍ପରକୁ ଅଭିନନ୍ଦନ ଜଣାଇବା ପାଇଁ ବାହାରେ ଏପଟ ସେପଟ ହେଉଥିଲେ। ଯେଉଁମାନେ ଆଜି ମୁଖ୍ୟ ପୋର୍ଟିକୋ ଦେଇ ସଚିବାଳୟ ଭିତରକୁ ପଶୁଥିଲେ, ସେମାନେ ବାଣିଜ୍ୟ ଓ ପରିବହନ ବିଭାଗ ପରିବହନ ବିଭାଗ ନିକଟରେ ପୂଜା ପାଉଥିବା ମହାପ୍ରଭୁ ଜଗନ୍ନାଥଙ୍କ ଆସ୍ଥାନ ନିକଟକୁ ଯାଇ ଦର୍ଶନ କରୁଥିଲେ। ମନ୍ତ୍ରୀ କରିଡର୍ରେ କିଛି ମନ୍ତ୍ରୀ ଆଜି ଉପସ୍ଥିତ ଥିଲେ।
ସେମାନଙ୍କ ବିଭାଗର ସଚିବ, ଅଧିକାରୀ ଓ କର୍ମଚାରୀମାନେ ସେମାନଙ୍କୁ ଶୁଭେଚ୍ଛା ଜଣାଇଥିଲେ। ବାହାରୁ ବହୁ ଲୋକ ମଧ୍ୟ ଆସିଥିବା ଦେଖାଯାଇଥିଲା। ଅଧିକାରୀ ଓ କର୍ମଚାରୀମାନେ ବେଶୀ ଭିଡ଼ ଜମାଇଥିଲେ ମୁଖ୍ୟ ଶାସନ ସଚିବ ଓ ଉନ୍ନୟନ କମିସନର୍ଙ୍କ ପ୍ରକୋଷ୍ଠରେ। ଉଭୟଙ୍କ ଚାମ୍ବର୍ରେ ପଶି ଶୁଭେଚ୍ଛା ଜଣାଇବାକୁ କାହାରିକୁ ବାଧା ଦିଆଯାଇ ନ ଥିଲା। ଏହା ବାଦ୍ ଅନ୍ୟ ବିଭାଗର ସଚିବମାନଙ୍କୁ ନିଜ ନିଜ ବିଭାଗର କର୍ମଚାରୀମାନେ ଅଭିନନ୍ଦନ ଜଣାଉଥିଲେ।
Prasanta Patnaik