ରାଉରକେଲା, ୬ା୧ : ବିଶ୍ରାଥାନା ଅନ୍ତର୍ଗତ ବାଙ୍ଗୁରକେଲା ନିକଟରେ ଦକ୍ଷିଣ କେବିନରୁ ପୁଲିସ ଜଣେ ରେଳ କର୍ମଚାରୀଙ୍କ ମୃତଦେହ ଉଦ୍ଧାର କରିଛି । ମୃତକ ହେଲେ ବିଜାଡିହି ବାସିନ୍ଦା ବିଚା ଓରାମ୍ (୪୩) । ତାଙ୍କ ମୃତ୍ୟୁର କାରଣ ଅସ୍ପଟ ରହିଥିବା ବେଳେ ରେଳବାଇ ପୁଲିସ ଶବ ଜବତ କରି ଘଟଣାର ତଦନ୍ତ ଆରମ୍ଭ କରିଛି ।
ବାଙ୍ଗୁରକେଲା ଷ୍ଟେସନ ମାଷ୍ଟରଙ୍କ କହିବା ଅନୁଯାୟୀ, ବିଚା ପ୍ରତିଦିନ ଦକ୍ଷିଣ କେବିନ ରେଳ ଫାଟକ ଖୋଲିଥାନ୍ତି । ଗୁରୁବାର ରାତି ୯ଟାରେ ବିଚାଙ୍କ ସହ ଯୋଗାଯୋଗ ହୋଇଥିଲା । କିନ୍ତୁ ଶୁକ୍ରବାର ସକାଳ ରେଳବାଇ ଗେଟ୍ କ୍ରସିଂ ବନ୍ଦ ରହିଥିବାରୁ ବହୁ ଯାତ୍ରୀ ଅସୁବିଧାର ସମ୍ମୁଖୀନ ହୋଇଥିଲେ । ଗେଟ୍ ଘଣ୍ଟା ଘଣ୍ଟା ଧରି ବନ୍ଦ ରହିଥିବାରୁ ଲୋକେ ଏହି କେବିନ ଭିତରେ ପଶିଥିଲେ ଓ ସେତେବେଳକୁ ବିଚା କମ୍ବଳ ଘୋଡ଼ାଇ ଶୋଇଥିଲେ ।
ତେବେ ଲୋକେ ଯେତେ ଡାକିଥିଲେ ମଧ୍ୟ ସେ ଉଠି ନ ଥିଲେ । ଏଥିରେ ସନ୍ଦେହ ହେବାରୁ ଲୋକେ ବନ୍ଦମୁଣ୍ଡା ରେଳବାଇ ପୁଲିସଙ୍କୁ ଖବର ଦେଇଥିଲେ । ରେଳବାଇ ପୁଲିସ ଓ ଡାକ୍ତର ଘଟଣାସ୍ଥଳରେ ପହଞ୍ଚି ମୃତକଙ୍କୁ ଉଦ୍ଧାର କରିଥିଲେ ।
Prasanta Patnaik