ଭୁବନେଶ୍ବର: ଚଳିତ ବର୍ଷ ଜାନୁଆରି ଶେଷ ସୁଦ୍ଧା ଓଡ଼ିଶାରେ ମୋବାଇଲ୍ ଗ୍ରାହକଙ୍କ ସଂଖ୍ୟା ୩ କୋଟି ୩୨ ଲକ୍ଷରୁ ଅଧିକ ହୋଇଛି। ପ୍ରାୟ ସାଢ଼େ ଚାରି କୋଟି ଲୋକ ବାସ କରୁଥିବା ରାଜ୍ୟରେ ପ୍ରତି ୧୦୦ ଜଣଙ୍କ ମଧ୍ୟରୁ ୭୬ ଜଣଙ୍କ ପାଖରେ ମୋବାଇଲ୍ ରହିଛି। କିନ୍ତୁ ଜାତୀୟ ହାର (୮୭.୪୫%) ଠାରୁ ଓଡ଼ିଶା ଏବେବି ପଛରେ ରହିଛି। ଭାରତୀୟ ଦୂରସଂଚାର ନିୟାମକ କର୍ତ୍ତୃପକ୍ଷ (ଟ୍ରାଇ) ଜାରି କରିଥିବା ତଥ୍ୟ ଅନୁଯାୟୀ, ଗତ ଜାନୁଆରିରେ ରାଜ୍ୟର ମୋବାଇଲ୍ ନେଟ୍ୱର୍କରେ ୧ ଲକ୍ଷ ୫୯ ହଜାର ନୂଆ ଗ୍ରାହକ ଯୋଡ଼ି ହୋଇଛନ୍ତି। ଫଳରେ ମୋଟ୍ ମୋବାଇଲ୍ ଗ୍ରାହକ ସଂଖ୍ୟା ୩.୩୨ କୋଟିରୁ ଅଧିକ ହୋଇଛି। ଗତ ଜାନୁଆରିରେ ରିଲାଏନ୍ସ ଜିଓ ୨.୮ ଲକ୍ଷ ନୂଆ ଗ୍ରାହକ ଯୋଡ଼ିଥିବା ବେଳେ ସରକାରୀ କଂପାନି ବିଏସ୍ଏନ୍ଏଲ୍ ନେଟ୍ୱର୍କରେ ୭୬,୦୦୦ ନୂଆ ଗ୍ରାହକ ସାମିଲ ହୋଇଛନ୍ତି। କିନ୍ତୁ ଭାରତୀ ଏୟାରଟେଲ୍ ଓ ଭୋଡାଫୋନ୍ ଆଇଡିଆ ଅନେକ ଗ୍ରାହକ ହରାଇଥିବାରୁ ନୂତନ ଭାବେ ଯୋଡ଼ି ହୋଇଥିବା ଗ୍ରାହକ ଏବଂ କଟିଥିବା ଗ୍ରାହକଙ୍କୁ ନେଇ ମୋଟାମୋଟି ହିସାବ କରିବା ପରେ ଜାନୁଆରିରେ ୧.୫୯ ଲକ୍ଷ ନୂଆ ଗ୍ରାହକ ଯୋଡ଼ି ହୋଇଥିବା କୁହାଯାଇଛି। ଭାରତୀ ଏୟାରଟେଲ୍ ୧.୩୭ ଲକ୍ଷ ଓ ଭୋଡାଫୋନ୍ ଆଇଡିଆ ୫୯,୦୦୦ ଗ୍ରାହକ ହରାଇଛନ୍ତି।
Prasanta Patnaik